Швед зохиолч, сэтгүүлч Стиг Ларсоны сэтгэлзүйн триллер бүтээл болох “Милленниум” цувралын анхны дэвтэр Луун шивээст охин роман Шведийн Norstedts Förlag хэвлэлийн газраас 2005 онд худалдаанд гарчээ. Зохиолч алдарт “Милленниум” цувралынхаа гар бичмэлийг хэвлэлийн газарт илгээгээд удалгүй зуурдаар нас барсан нь энэхүү бүтээлийг улам ч сонирхолтой, учир битүүлэг болгосон байж болох юм. Ямартаа ч Луун шивээст охин роман гарсан даруйдаа дэлхий дахинаа бэстселлэр болсон билээ. Зохиомол хот Хедестадыг эс тооцвол үйл явдал Шведийн бодит хотуудад өрнөнө. Номд гардаг “Милленниум” сэтгүүлийн газар нь нийгэм улс төрийн сэдэв санхүүгийн хэргүүдээр нийтлэл бичдэгээрээ Ларсоны Экспо сэтгүүлийн газрыг санагдуулна. Санхүүгийн гэмт хэргийг эрэн сурвалжилсан нь бүтэлгүйтсэнээр Микаел Бломквистын сэтгүүлчийн карьер нүднийх нь өмнө нуран унах шиг болох тэр л мөчид түүний нэрийг Шведийн аж үйлдвэрийн эзэн хөгшин дуулсан байлаа. Тэрээр Бломквистод итгэн, дөчин жилийн өмнө алга болсон өөрийн зээ охины учир битүүлэг хэргийг мөрдөх санаанд оромгүй санал тавьж, хэргийг мөрдөхөд жилийн хугацаа өгнө. Бломквист уг саналыг хүлээн авахдаа тус хэргийн цаана нуугдах нууц хуйвалдаан, харгис хэрцгий явдлыг төсөөлөх ч үгүй. Түүний нэрийг дуулсан цорын ганц хүн нь өнөөх хөгшин биш байсан бөгөөд жинхэнэ чадварлаг хакер, хувийн мөрдөгч Лизбет Саландер өөрөө түүнтэй холбоо тогтооно. Улстөрчид, санхүүгийн акулуудаас эхлээд хууль хүчнийхэн хүртэл хутгалдан сүлбэлдсэн аймшигт гэмт хэргүүдийг илрүүлэхэд нэгэнтээ тэдний зам нийлжээ.

Луун шивээст охин

Стиг Ларсоны алдарт “Милленниум” цувралын хоёрдугаар дэвтэр Галаар наадсан охин роман нь анх 2006 онд Швед улсад хэвлэгдэн гарч, Англи улсад 2009 онд хэвлэгдсэн байна. Энэхүү номд эхний дэвтрийн гол баатрууд болох компьютрийн сод мэргэжилтэн Лизбет Саландер, “Миллениум” сэтгүүлийн эрэн сурвалжлах сэтгүүлч Микаел Бломквист нарын адал явдал үргэлжилнэ. Шведийн кроныг хэдэн тэрбумаар нь эргэлдүүлж байдаг секс-хүний наймааны талаарх хамгийн дуулиант нууц баримтыг 'Миллениум' сэтгүүл дэлгэж, энэхүү зах зээлийн олон улсын сүлжээг илчлэв. Хоёр цогцос олдлоо. Аллагад ашигласан байж болзошгүй зэвсгийг хэргийн газрын ойролцоогоос илрүүлэв. Орон сууцны хороололд гарсан илэрхий мэргэжлийн шинжтэй уг гэмт хэрэг цагдаа нарыг түгшээнэ. Чадварлаг хакер, хувийн мөрдөгч Лизбет Саландер зорилгоо гүйцээх үүднээс бүх л зэвсгийг эзэмшиж сурчээ. Тэрээр ялзрал, завхрал, зүй бус үзэгдлийг ялангуяа эмэгтэйчүүд хүчирхийлүүлж, доромжлуулахыг үл тэвчинэ. Хакерын гарамгай чадвараа ашиглан “Миллениум” сэтгүүлийн сурвалжлагч Микаел Бломквистэд хүний наймаа, сексийн зах зээлийн нууц хэргүүдийг илрүүлэхэд туслахаар нууц байрандаа бүгж байх хооронд нь цагдаагийнхан гурван ч өөр аллагад түүнийг сэжиглэн мөрдөж эхлэв. Саландерийг сэтгэцийн өвчтэй гэх нотлох баримт гарч ирээд зогсохгүй, хүн амины хэргийн газраас хурууны хээг нь хүртэл илрүүлэх аж. Түүнийг олох ганц арга бол компьютер. Гэвч тэр өөртэй нь холбогдох гэсэн бүхий л оролдлогыг няцааж, сүлжээг будилуулж дөнгөнө. Ямар ч ов мэх, арга чарга, халдлага түүнд үйлчилдэггүй. Шведийн цагдаагийн хүчнийхэн, Бубланскийн баг түүнийг мөшгөх зуур гэмт хэргийн сүлжээний хамсаатан болох туйлын хэрцгий эр Саландерийг авлахаар замдаа гарчээ.

Галаар наадсан охин

Стиг Ларсоны алдарт “Милленниум” цувралын гуравдугаар дэвтэр Зөгийн үүр бусниулсан охин роман нь 2007 онд Шведэд хэвлэгдэж, 2009 онд Их Британи, Америк улсад, 2010 онд Канад улсад тус тус худалдаанд гарсан байна. Цувралын гол дүр Лизбет Саландер тархиндаа буудуулсны улмаас үхэх сэхэхийн даваан дээр эмнэлэгт ухаангүй хэвтэнэ. Хэрэв тэр амьд гарвал гурван хүний амийг бүрэлгэсэн хэрэгт буруутгагдаж, шүүхэд дуудагдана. Харин амь насаа алдвал жинхэнэ хэргийн эзэн амар тайван үлдэнэ. Гэвч Лизбет үүнийг хүлээн зөвшөөрч, бууж өгөх болов уу? Тэгээд ч тэр ганцаараа биш шүү дээ. Лизбет Саландер амь насыг нь хөнөөх гэсэн балмад эр болон амьдралыг нь нураан сүйдэлсэн төрийн институцээс өс хонзонгоо авна. Шударга бус тогтолцооноос болж айхтар хохирсон тэрээр хэнд ч итгэж болохгүйг яс махандаа шингэтэл ухаарсан боловч энэ удаад ганцаараа тэмцэж хүчрэхгүй байв. Мөр, толгойдоо буудуулж хүнд гэмтсэнээс болж эрчимт эмчилгээний тасагт эмчлүүлэх зуур түүний хамгийн заналт дайсан хажуу өрөөнд нь хэвтэнэ. Амьд гарах аваас хүн амины хэрэгт буруутгагдах аюул тосож байлаа. Цагдаагийн албан ёсны хамгаалалт дор Саландерыг зөвхөн эмч болон өмгөөлөгчтэйгөө харилцахыг зөвшөөрнө. Харин 'Миллениум' сэтгүүлийн редактор Микаел Бломквист уг зөрүүд, дийлдэшгүй охиноос нүүрээ буруулахыг хүссэнгүй. Бломквист түүнтэй шууд харилцаж болохгүйгээ ухаарахын сацуу компьютерийн сод мэргэжилтэн охин хурууны үзүүрээ хөдөлгөх төдийд хүссэн мэдээлэлдээ нэвтэрнэ гэдгийг мэдэж байлаа.Сэтгэцийн эмнэлэг, балмад хүчирхийллийг даван туулж гарсан Саландер энэ удаад хэрхэн тэмцэх бол?

Зөгийн үүр бусниулсан охин

Луун шивээст охин: Яаж ч хичээгээд зохицож чадамгүй болтол нийгэмдзэ гадуурхагдсан сод хакер Лизбэт Саландер.Үзүүлж өгдөг сэтгүүлч: Нийгмийнхээ авилга, ялзралыг ил болгохыг зорьсон Микаел Бломквист.&nbsp;&nbsp;Тэр хоёр холбогдолгүй нэлээд уджээ. Гэтэл Шведийн нэрт эрдэмтэн профессор Болдэр бээр Бломквисттой холбогдоно. Амь насанд нь аюул учраад буй тухай сануулга авсан ч өөрөөсөө илүүтэй хүүдээ сэтгэл зовнисон Болдэрын "Millennium" сэтгүүлд хэвлүүлэхийг хүссэн зүйл нь аймшигт нууцыг задласан нийтлэл байлаа. Хэдийгээр Шведийн тусгай алба «Сайпо» түүнийг хамгаална гэж амласан ч Болдэр өөрөө нууц байдалд орсноос олон нийтэд ил байвал аюул багатай гэж үзнэ. Болдэр дэлхийд тэргүүлэх Хиймэл оюун ухааны төсөл дээр ажиллаж байгаа гэдгээс илүү тэрбээр луун шивээст охинтой хамтарч ажиллаж байсан нь Бломквистын сонирхлыг татав.&nbsp;&nbsp;Саландер харин өөрийнхөө ажлыг хийж байв. Тэрбээр өшөө авах хүсэлдээ автан Америкийн Үндэсний аюулгүй байдлын албаны сүлжээнд нэвтрэхдээ Хэдгэнэ хэмээх хуучин нууц нэрээ ашигласан нь үй түмэн асуудал дагуулна. Болдэрын адил тэрбээр Аалзнууд хэмээн өөрсдийгөө нэрлэдэг энэрэх сэтгэлгүй цахим дээрэмчдийн бай болов. Энэхүү нууц бүлэглэлийнхэн тун ч удалгүй цасанд дарагдсан Стокхолмын гудамжуудаар Миллениумын багийнхан, улмаар Бломквист, Саландер нарыг ангуучилж эхэлнэ.&nbsp;&nbsp;Сэтгэл догдлуулсан ээдрээтэй үйл явдалтай, нэгэн амьсгаагаар уншаад дуусгамаар шимтэм энэ зохиолыг Стиг Ларссоны Миллениум гурвалаас сэдэвлэн бичжээ. Лизбэт, Бломквист хоёр дэлхий даяарх олон олон сая уншигчдаа догдлуулсаар байна.

Аалзны торонд орооцолдсон охин

“Миллениум” цувралын тавдугаар дэвтэр Амийг амиар сольсон охин роман 2017 онд дэлхийд нээлтээ хийжээ. Уг цувралын зохиолч Стиг Ларсон 2004 онд зуурдаар нас барсан боловч Давид Лагеркранц цувралыг үргэлжлүүлэн бичиж, өдгөө хоёр дахь романаа гаргаад буй нь энэхүү зохиол билээ. Энэ удаад ч Лизбет, Бломквист хоёр гэмт хэргийн бохир ертөнцөд өөрсдийн тэмцлийг үргэлжлүүлнэ. Лизбет Саландерийг хэн ч зогсоож чадахгүй: Бяцхан хүүгийн амийг аварсныхаа төлөө Флодберг эмэгтэйчүүдийн хорих ангид хоёр сарын ял эдэлж буй ч тэрээр өөрийгөө өмгөөлж нэг ч үг хэлсэнгүй. Учир нь түүнд үүнээс илүү чухал ажил бий. Микаел Бломквист түүнийг долоо хоног бүр эргэхдээ, юу хийх талаар зааварчилгаа авна. Энэ нь “Миллениум” сэтгүүлд нийтлэгдэхүйц маш чухал, дуулиант хэргийн талаар бөгөөд Бломквист ч боломжийг алдалгүй шүүрэхээ мэднэ. Харин Саландерийн хувьд хүүхэд насны ээдрээт дурсамжаасаа чөлөөлөгдөх гарц харагдана. Хээл хахуульд идэгдсэн шоронгийн системийг үнэн хэрэгтээ хоригдлууд удирдах хэдий ч Саландер бууж өгөлгүй, шударга үнэний төлөө бат зогсоно. Түүнчлэн бага насны ой санамжаасаа хүзүүн дээрээ галаар тургисан луун мэнгэтэй нэгэн эмэгтэйг эрж хайх аж.

Амийг амиар сольсон охин

Миллениум цувралын зургаадугаар дэвтэр болох Хоёронтоо амьдарсан охин роман нь 2019 онд анх нээлтээ хийжээ. Уг цувралын зохиолч Стиг Ларсон 2004 онд зуурдаар нас барсан тул Дэвид Лагеркранц цувралыг үргэлжлүүлэн бичиж, өдгөө энэхүү дараачийн романаа гаргаад буй нь энэ билээ.&nbsp;Энэ удаад ч Лизбет, Бломквист хоёр гэмт хэргийн бохир ертөнцөд өөрсдийн тэмцлийг үргэлжлүүлнэ. Ээмэг, луун шивээс бүхий цуцашгүй Лизбет Саландер Стокголм дахь байраа зарж, гэнэт ор сураггүй алга болно. Тэрээр хаана байгаагаа хэнд ч үл хэлнэ. Энэ үеэр Микаел Бломквист Лизбеттэй холбогдохыг хичээх агаад учир нь ямар ч бичиг баримт, орон гэргүй нэгэн эрийн халааснаас Бломквистийн утасны дугаар олддог. Тэрээр үхэхийнхээ өмнө засгийн газрын гишүүнд хаягласан, аюул тулгарч болох тухай ойлгомжгүй үгс бичиж орхижээ. Энэхүү ээдрээт хэргийн учрыг тайлахад Лизбетийн тусламж хэрэг болдог.Бломквист, Саландер хоёр, дахин бие биедээ туслан, үнэнийг алхам алхмаар нээн илрүүлэх болно. Хамгийн сүүлд хэний ч төсөөлөөгүй мөчид Бломквист өөрийгөө золионд гарган, Лизбетийг амьдралынхаа хамгийн чухал тулаантай нүүр тулах боломжийг олгодог. Энэ нь Лизбетийн ихэр эгч Камиллагийн эсрэг тулаан байх болно.

Миллениум - Цахим