Пиппи завиар аялсан нь - Шведийн зохиолч Астрид Линдгрений хүүхдийн цуврал зохиолын хоёрдугаар боть бөгөөд 1946 онд хэвлэгджээ. Эхний ботийн нэгэн адил Ингрид Ванг Ниман номын зургийг зурсан. Эхний номд Шведийн жижигхэн тосгонд гэрийн тэжээмэл сармагчин, морь хоёрынхоо хамт амьдардаг есөн настай бяцхан охины талаар болон түүний гайхалтай түүхүүдийг өгүүлдэг билээ. Харин Пиппи завиар аялсан нь хэмээх хоёрдугаар цуврал дээр Пиппи, Томми, Анника гэх хоёр найзын хамтаар хөгжилтэй зүйлс хийж, өөрийн ямар ч дүрэм журамд баригддаггүй чөлөөт ертөнцөд хэрхэн адал явдлыг бүтээж байгааг өгүүлдэг. Тэгтэл удаан хугацаанд эзгүй байсан Пиппигийн ааваас захиа ирснээр тэд Така Тукагийн орныг зорино.

Пиппи завиар аялсан нь

Урт оймст Пиппи нь Ингрид Ванг Ниман зургийг нь зурснаар 1945 онд хэвлэгдэж, 40 гаруй орны хэл дээр орчуулагдсан Шведийн алдартай хүүхдийн зохиол юм. 1950 онд анх удаа англи хэл дээр орчуулагдан гарсан ба 2002 онд Норвегийн нобелийн институт уг номыг Дэлхийн уран зохиолын 100-н шилдэг бүтээлийн нэгээр нэрлэсэн байдаг.Номд Шведийн жижигхэн тосгонд гэрийн тэжээмэл сармагчин, морь хоёрынхоо хамт амьдардаг есөн настай бяцхан охины талаар болон түүний гайхалтай түүхүүдийг өгүүлнэ. Пиппигийн гол эд хөрөнгө нь алтан зоосоор дүүрэн цүнх, төрөл бүрийн жижиг эрдэнэстэй олон шургуулга бүхий шүүгээ хоёр юм. Түүний аав нь далайчин бөгөөд ихэвчлэн эзгүй байдаг тул, охин хоолоо хийж, гэрээ цэвэрлэн, байшингаа засаж, тэжээмэл амьтдаа ч арчлан бүхнийг өөрөө бие даан хийж амьдардаг юм. Бүх насаараа аавынхаа хамт тэнгис далайгаар хэсүүчлэн амьдарсан Пиппи хэтэрхий эрх дураараа, хүмүүжилгүй гэмээр зантай. Тэр хөрш айлынхаа Томми, Анника хоёртой сайн найзууд бөгөөд тэдэнтэйгээ хамт өдөр бүрийг адал явдлаар дүүрэн өнгөрүүлдэг.&nbsp;

Урт оймст Пиппи

...Тэр жинхэнэ хайрын эзнийг бусдаас юугаар нь ялгах юм бол? Дүр төрх нь зүрх рүү шууд харван ормогцоо л хэвд цутгасан юм шиг яв цав таарчхаад, байрыг нь өөрчилж ч, бүрмөсөн устгаж ч болдоггүй юм болов уу? Эцэст нь нэг жинхэнэ хайртайгаа учрахаараа хүн яаж ч чадалгүй өмнө нь сөхөрдөг хэрэг үү?... Уг зохиолоос та бүхэн загвар өмсөгчийн замнал дуусгавар болж, гоо үзэсгэлэн нүүрээ буруулахад нэгэн үе од болон гялалзаж явсан загвар өмсөгч нарт ямар сэтгэгдэл төрдөг бол?, Загварын ертөнцөд ямар ямар сүүдэртэй талууд байдаг вэ?, Загвар өмсөгч нарыг бусад хүмүүс хэрхэн хардаг бол?, Хайр дурлалын үнэ цэн нь юунд оршино вэ?, Ер нь хайр дурлал гэж байдаг юм уу? гэх мэт олон асуултын хариуг олох болно.

Хайрын тухай надад яриач

Хилэн хар нь 1877 онд хэвлэгдсэн ба 50 сая хувь борлуулагдсан бүх цаг үеийн хамгийн их борлуулалттай номнуудын нэгт зүй ёсоор багтдаг. Хүмүүсийн харилцааны чухал хэсгүүдийг морьд болоод эздийн харилцаагаар төлөөлүүлэн уран яруу илэрхийлсэн бөгөөд нинжин сэтгэл, хайр энэрэл, хүндлэлийн үнэ цэнэ хийгээд амьдралын нугачааг зориг тэвчээрийн хүчээр даван туулж буй сэтгэл хөдөлгөм түүхийг өгүүлдэг билээ.
Зохиолын гол дүр нэгдүгээр биеэс өгүүлж байгаа хэлбэрээр бичигдсэн ба энэхүү зохиол нь хилэн харын аз жаргалтай бага насаар эхэлж, адармаатай идэр нас, мөн эх нутагтаа эргэн ирж буй баярт мөчийг харуулдаг. Анна Сьюэлл зохиолыг зөвхөн хүүхдэд зориулаад зогсохгүй тухайн үеийн морьдын эзэд, сургагч нарт, түүнчлэн амьтанд хайртай хүн бүрд зориулан бичсэн гэж өөрөө хэлж байсан удаатай. Сургаж номлосон байдлаар бичээгүй ч, бүх насныхан уншиж болохоор ба хэдэн зууны турш үнэ цэнээ алдахааргүй үнэт бүтээл юм гэж уг зохиолыг “BBC” агентлагаас явуулсан үндэсний хамгийн хайртай зохиолын 58 дугаарт бичигдэх үед тус агентлагаас тодорхойлжээ.

Хилэн хар

Зохиолч Рожер Ланслин Грийн нь 1919 онд Их Британийн Норфолк мужийн Норвич хотод мэндэлжээ. Тэрээр “Трой хотын үлгэр”, “Эртний египетийн үлгэрүүд”, “Грекийн баатруудын үлгэрүүд”, “Артур хаан ба дугуй ширээний хүлэг баатрууд” зэрэг эртний үлгэр домог, туульсын олон ном бүтээл гаргасан юм. Та бүхэндээ хүргэж буй энэ ном нь Английн ард түмэнд олон зуун жилийн турш амнаас ам дамжин, шударга ёс, эрэлхэг баатарлагийн жишээ болж олон янзын үлгэр домогт мөнхөрсөн сайн эрийн түүх билээ. ...Ингээд харанхуй ойд ууль шувууны дуу хадаж, тэртээ хол нэгэн чоно улих зуур онгон зэлүүд ойн цоорхойд, тэд бүгд сөхөрч суугаад, тангаргаа өргөлөө. Хэдийгээр тэд хууль зөрчсөн, оргож зайлсан гэмтнүүд ч гэлээ амлалт өчиг нь ариун бөгөөд үнэн байжээ. Саксончууд булаан эзлэгч, дарлан мөлжигчид байсан тэр цаг үед, Артур хааны ширээнд заларч асан язгууртан хүлэг баатар ч тэдний дунд байв.

Робингүүдийн адал явдал

Шар тоосгон замаар явсаар Маргад эрдэнийн хотод очиж байгаа Элли охины тухай уран зөгнөлийн энэхүү зохиол нь Александр Волковын хамгийн алдартай бүтээлүүдийнх нь нэг юм. Тэдний байшин эргэлддэг тоглоом адил дороо хоёр гурав эргэснээ хуй салхины голд хамагдан орж дээш хөөрөв. Гэтэл айж сандарсан Элли хаваа тэврэн хаалгаар цухуйх нь харагдлаа. Одоо яадаг билээ? Доошоо газар луу үсрэх үү? Гэвч нэгэнт оройтжээ. Аль хэдийн тэнгэрт хөөрчихсөн байлаа... Энгийн амьдралтай нэгэн охинд тохиолдож байгаа ер бусын адал явдлаар зохиолч маань хүүхдийг төсөөллийн ертөнцөөр аялуулж, ид шид гайхамшигт автуулж, уншигч хүүхдээ төлөөлүүлэн бодох боломжийг олгож, шинжлэх ухааныг болон бодит байдлыг танин мэдэхэд зохиолын утга санаа агуулгаа чиглүүлсэн нь үе үеийн уншигчдын хамгийн дуртай, сонирхолтой зохиолуудын нэг байсаар байна.

Маргад эрдэнэ хотын шидтэн

Александр Грин нь хүүхэд залуучуудыг мөрөөдөл, итгэлээр жигүүрлэн үүндээ хүрэх урам зоригт хөтөлсөн бүтээлүүд туурвисан билээ. Зохиолчийн мэндэлсний 120 жилийн ойгоор ОХУ-ын зохиолчдын эвлэл Киров, Слободов хотуудын захиргаатай хамтран Александр Гриний нэрэмжит "Утга зохиолын шагнал"-ыг бий болгон, 2000 оноос хойш жил бүр шагнадаг болжээ. ...Охин нэг байшингийн дээврээс нөгөө рүү санаандгүй харж байтал гудамжны харалдаа харагдах тэнгисийн хэсэгхэн цэнхэр завсарт аранзал улаан дарвуултай цав цагаан онгоц байх нь түүний нүдэнд тусав. Гэнэтхэн зүрх нь толгой эргэтэл булгилж, хөөрч баярласандаа нулимс нь урсан гарах тэр агшинд огло үсрэн босов. Энэ үед 'Секрет' хөлөг зүүн хажуугаараа эрэг даган явсаар багавтар хошууг тойрч байв. Аранзал өнгөт торгон гал дор байх цасан цагаахан тавцангаас нь зөөлөн ая эгшиглэн хөх ёроолтой уусан нийлэх аж...

Аранзал дарвуул

Таро хаа явсан газраа зүггүйтэж байдаг жирийн л нэг жаал. Гэхдээ түүнд хэнд ч байдаггүй нэгэн хачирхалтай зүйл бий. Тэр нь хурмастын хаан Луунд байдаг хайрс юм. Таро өөрийгөө яагаад хоёр хавиргандаа хайрстай төрснийг огтхон ч мэддэггүй. Зүгээр л мэнгэтэй ижил санадаг байв. Гэтэл нэгэн өглөө хайрс нь олон чухал зүйлийн зангилаа болохыг Таро ойлгоно. Ингээд Таро дуу цахилгаантай ширүүн бороо, хүчтэй салхи, аймшигт хар чоно, муу санаат чөтгөрүүд, тахиан хатагтай, ид шидэт Тэнгү нартай таарах адал явдлаар дүүрэн аяллаа эхэлдэг. Уг номын зохиогч Миёоко Мацүтани бол Японы нэртэй зохиолчдийн нэг бөгөөд олон улсын хүүхдийн шилдэг зохиолд олгодог “Ханс Кристиан Андерсен”-ий нэрэмжит шагналыг “Луугийн хүү Таро” зохиолоороо хүртэж байжээ.

Луугийн хүү Таро

Арван хүүхэдтэй айлын ууган нь байсан зохиолч Карло Коллодигийн хүүхэд нас хотын гудамжны хатуу ширүүн, хөл үймээн дунд өнгөрчээ. Тэрээр сонинд сэтгүүлчээр ажиллаж, роман болон жүжгийн зохиол бичдэг байв. Хожим нь тэр хүүхдийн зохиол бичихэд үлдсэн амьдралаа зориулахаар шийджээ. Карло 1875 онд Шарль Перрогийн шидэт үлгэрүүдийг Франц эхээс орчуулж, дараа жил нь Жианнеттино хэмээх гол дүр бүхий цуврал номууд бичив. Тэгсэн ч түүний хамгийн амжилттай ном нь үргэлж Пиноккио байсаар ирсэн билээ. "...Учир нь... учир нь, бяцхан хэрэм минь, би чинь ямар ч бодол ухаангүй, зүрх сэтгэлгүй хүүхэлдэй шүү дээ. Өө, надад жижигхээн зүрх байсан ч болоосой тийм байсан бол ээж шиг минь намайг хайрлаж, миний төлөө маш ихийг хийсэн сайхан сэтгэлт дагинаа орхихгүй байсан юм. Тэгсэн бол би одоо хүүхэлдэйн жаал байхын оронд, бусдын адил жинхэнэ хүүхэд болчихсон байх байлаа..."

Пиноккио

Испанийн зохиолч Элена Алонсо Фрайлийн 2015 онд бичсэн ''Дууч хөвгүүд'' номд дуу хөгжмөөр холбогдсон хоёр хүүгийн тухай өгүүлнэ. Начо хэмээх Испани хүү дэлхийн хоёрдугаар дайны үед аялан тоглолт хийж яваад гэртээ харих аргагүй болж Австрали тивд бүрмөсөн үлдсэн Венийн найрал дууч хөвгүүдийн тухай тэр дундаа Густав хэмээх хүүгийн сэтгэл догдлом түүхийг олж сонсоно. Зохиолд өөр цаг хугацаа, өөр өөр газарт энэ хоёр хүүгийн амьдрал зэрэгцэн өрнөж Начо Густавын түүхээс айдас, ганцаардлаа даван туулах урам зориг авдаг. Густав аялах бас дуулах дуртай, 1938 онд 10 настайдаа тэр аль хэдийн алдартай болсон байлаа. Учир нь тэр ''Венийн найрал дууч хөвгүүд''-ийн нэг байсан юм. Дэлхийг тойрч, урт удаан хугацаагаар аялан тоглолт хийж явсан хөвгүүд дайны улмаас эх орондоо буцах аргагүй болж Австралид үлдэн, үрчлэгддэг. Густав 20 жилийн дараа хуримаа хийхдээ л гэр бүлийнхэнтэйгээ ахин уулзана. Олон жилийн дараа Мадридад амьдардаг Начо хүү энэ түүхийг санамсаргүй олж сонсоно. Начо ч бас дуу хөгжимд хайртай, өөр хотод нүүж ирээд удаагүй болохоор найз нөхөдгүй ганцаардана. Ээж нь түүнд дууч шувуу бэлэглэж Начо шувуундаа хэрхэн дуулахыг зааж өгснөөр ганцаардахаа больж, найз нөхөдтэй ч болно. Төмөр торон доторх дууч бяцхан шувуу Амадеус болон түүнтэй адил ганцаардан гуних Начогийн зан байдлаас уншигчид зарим үед хүмүүс бид гадаад ертөнцөөс өөрийгөө тусгаарлан, эргэн тойрнынхноо өөрийн таамгаар дүгнэж, өрөөсгөл бодолдоо хүлэгдэж байдгийг олж харах болно. Густавын түүхийг сонссоноор Начо аливаа зүйлийг гүн гүнзгий, өргөн хүрээтэй харж, дотоод зөрчлөөсөө чөлөөлөгдөж чадна. Тэднийхээр байнга зочлон ирэх Эле эгчийгээ уйтгартай, залхмаар хөгшин хэмээн түвэгшээж байсан нь ч өөрчлөгдөж, Густавын тухай сонссоноор өнгөрсөн цаг хугацаагаар аялаж, энэ настай эмэгтэйн дотоод сэтгэлийн сайхныг бишрэх болно. Далан жилийн тэртээ нэгэн хөвгүүнд тохиолдсон хэрэг явдлаас орчин цагийн өөр нэгэн хөвгүүн өөрийгөө нээж харах түлхүүрийг олох юм. Гучаад оны үеийн Венийн дууч хөвгүүдийн түүхээс сэдэвлэн басхүү австричуудын соёл, олон үнэтэй санаагаар баяжуулан, өнгөрсөн ба одоо цагийн үйл явдлыг хэлхэн бичихдээ хэн нэгний түүх өөр нэг хүнд хэрхэн нөлөөлдөг болохыг энэ зохиол харуулжээ. Түүнчлэн төрж өссөн орчин ахуйгаасаа салж, холдсон хэн бүхэнд тохиолддог бэрхшээлийн тухай, нөхөрлөл, хөгжим тэр дундаа найрал дуучид хамтын хүч чармайлтаар нэг хүн мэт болдог тухай ч өгүүлжээ. Австралийн үндэсний музейд ''Венийн Дууч хөвгүүд''-д зориулсан танхим одоо ч бий. Хөгжим, хүүхэд нас тэднийг холбож Начо нас дээр гарсан Густавд захидал бичнэ... Гайхалтай басхүү сэтгэл шимшрэм бодит түүхээс сэдэвлэн бичсэн, усан будгийн зургуудтай энэхүү номыг уншаарай.

Дууч хөвгүүд

Эдвард Тюдор, Том Кэнти хоёр бараг адилхан боловч дор дороо өөр амьдралтай, өөр өөрийн гэсэн онцлогтой хүүхдүүд. Эдвард Английн хаан ширээг залгамжлагч бол Томын эцэг ядуу хулгайч. Тэр хоёр жаал нэг удаа санаандгүй тааралдаж уулзалдаад нэгнийхээ оронд амьдарч үзэхээр тохиролцоно. Гэтэл хэн хэн нь гэнэтийн саад бэрхшээлтэй учирдаг. Адал явдал, авхаалж самбаа, эр зориг, тэвчээр хатуужил шаардсан энэ адал явдлын явцад хоёр жаал ертөнцийг өөрөөр хардаг болно.

Жонон гуйлгачин хоёр

Пиппи Така Тукагийн оронд Шведийн зохиолч Астрид Линдгрений Пиппи хүүхдийн цуврал зохиолын гуравдугаар боть бөгөөд 1948 онд хэвлэгджээ. Өмнөх ботиудын нэгэн адил Ингрид Ванг Ниман номын зургийг зуржээ. Эхний хоёр цувралд, Шведийн жижигхэн тосгонд гэрийн тэжээмэл сармагчин, морь хоёрынхоо хамт амьдардаг есөн настай бяцхан охин Пиппигийн талаар, түүний гайхалтай түүхүүд, найзуудын хамтаар өнгөрүүлэх адал явдалт өдрүүд түүнчлэн ааваас нь захиа ирж байгаа тухай өгүүлдэг билээ. Харин цувралын сүүлийн номд буюу Пиппи Така Тукагийн оронд номд өмнөх цувралууд дээр гарсан үйл явдлаас хэсэг хугацааны дараах үе гардаг ба Пиппигийн аав ямар учраас халуун орны арлын хаанаар өргөмжлөгдсөн тухай ба Пиппиг аралдаа урьж, гүнжээр өргөмжлөх болсон тухай сонирхолтой түүхийг өгүүлж, Пиппи найзуудын хамт алс холын арлыг зорьж байгаа тухай гардаг.

Пиппи Така Тукагийн оронд

Эрих Кестнерын өгүүлсэн энэ зохиолд Гулливер одойчууд болон аварга биетэй хүмүүсийн оронд очиж байгаа тухай өгүүлдэг. Үнэхээр ийм газар байдаг гэдгийг чи мэдэх үү? Чиний аялалын төлөвлөгөөнд бичигдэж очиж үзэх гайхалтай газрын тоонд зүй ёсоор орно гэдэгт бат итгэлтэй байна. Ирландын шог зохиолч, яруу найрагч Жонатан Свифт өөрийн хамгийн алдартай бүтээл болох “Гулливерийн аялсан түүх” зохиолоо 1726 онд бичжээ. Уг зохиол нь тухайн үеийн нийгэм, хүмүүсийн хандлага харилцааг шүүмжилсэн далд ёгт агуулгатай. Харин Германы зохиолч Эрих Кестнер нь эх зохиолын үйл явдалд суурилан хүүхдэд зориулан дахин бичсэн байна. Эрих Кестнерын өгүүлсэн энэ зохиолд Гулливер одойчууд болон аварга биетэй хүмүүсийн оронд очиж байгаа тухай өгүүлдэг. Эдгээр том жижиг биетэй хүмүүсээр төлөөлүүлж хүний зан авир, хорон санаа, атаа хорсол, сайхан сэтгэл итгэл гэх мэт олон зүйлийн тухай өгүүлдэг. “Байж боломгүй юм! Та нар намайг юу олж харсан гэж бодож байна? Чигчий хурууны хумснаас томгүй хэмжээтэй, зэвсэг агссан дөчөөд хүн чээжин дээр минь зогсож байх юм. Гартаа жад, лоом барьж, зарим нь нум сум агсжээ. Тугалган цэргээс ч жижигхэн биетэй цэргийн жанжин нь гартаа сэлэм атгасан байв. Намайг ёолж орилох үед бараг тал нь цочсондоо унаж, дараа нь сонсоход тэдний хөл, гар хугарсан байв...” ...Гулливер хаана очсон мөн гэртээ буцаж харьсан эсэхийг энэхүү зохиолоос уншаарай. Үнэхээр ийм газар байдаг гэдгийг чи мэдэх үү? Чиний аялалын төлөвлөгөөнд бичигдэж очиж үзэх гайхалтай газрын тоонд зүй ёсоор орно гэдэгт бат итгэлтэй байна. Гайхалтай аялалд чинь амжилт хүсье.

Гулливерийн аялал

Германы зохиолч Эрих Кэстнерийг алдаршуулсан энэхүү хүүхдэд зориулсан анхны детектив роман анх 1929 онд хэвлэгдсэн бөгөөд өдгөө дэлхийн 60 хэлнээ орчуулагджээ.&nbsp;Үйл явдал нь гоёчилж зассан уран зөгнөлийн орчинд бус, тухайн үеийн Берлин хотын орчинд, амьдралд байх бодит дүрүүдийн талаар өгүүлдэг нь энэ романыг тухайн цаг үед бичигдсэн бусад хүүхдийн зохиолуудаас онцгойруулдаг. Түүнчлэн энэ романд ёс суртахууны сургаалыг ил тод тулгалгүйгээр, дүрүүдийн үйл хэргээр дамжуулан харуулсан нь гайхалтай.&nbsp;&nbsp;&nbsp;Эмээ дээрээ зочлохоор галт тэргээр явах үедээ ээжийнхээ эмээдээ өгөөрэй гэсэн мөнгийг хулгайд алдсан Эмил хүүгийн хэрхэн хулгайчийг барьсан тухай адал явдалт сэтгэл хөдөлгөм түүх билээ. Тэрээр хэрхэн бусад хүүхэдтэй нэгдэж, ямар зам туулан мөнгөө олж авсныг уншигч та бүхэнд үлдээе.

Эмил ба мөрдөгчид

Марион Ашард энэхүү бүтээлдээ томчуудын гаргадаг нийтлэг алдааг хошин, сонирхолтой байдлаар дүрсэлжээ. Тэрээр хүүхэд сахилгагүйтэл, бүтэлгүйтэл бүрээсээ ямар нэгэн шинэ зүйл сурч, мэдэж авдаг боловч түүнийг нь томчууд төдийлөн ойлголгүй төвөгшөөх хандлагатайг ч бас энд дурдсан байна. Зохиолд Лалли хэмээх индиан охинд тохиолдсон хөгтэй, хөгжилтэй, уйтай олон олон адал явдлууд хөвөрдөг. Тэрээр нэг ном дээр бичсэн Морзын кодыг өдөр шөнөгүй цээжилдэг. Гэвч хожим энэ нь худал зохиомол зүйл болохыг мэднэ. Ингэснээр тэр томчуудад эргэлзэх бөгөөд ямагт өөрөө бүгдийг туршиж үнэн, худлыг мэдэхийг хичээнэ. Ингэх явцад аав ээж, багш нартайгаа үл ойлголцолд хүрдэг. Ийнхүү цаашид юу болохыг танд үлдээе. ...Хүний тархи анх сурсан зүйлээ хамгийн түрүүнд санадаг шүү дээ. Тиймээс ямарваа нэг үгийг анхнаасаа л дүрмийн алдаатай бичээд сурчихвал дараа нь тэр үгээ бичихдээ байнга эргэлздэг болчихдогтой л энэ бүхэн яг адилхан. Тиймээс би жинхэнэ Морзын кодыг эхнээс нь сурах гэж асар их цаг зарцуулсан даа...

Цөөхүүл ч гэсэн бидний Индианчууд

Нэрт зохиолч, яруу найрагч Эрих Кэстнер нь 1960 онд бага насныхаа намтар зохиолоор Ханс Кристиан Андерсений шагналыг хүртсэн бөгөөд Утга зохиолын нобелийн шагналд дөрвөнтөө нэр дэвшиж байжээ. Эмил ба мөрдөгчид (1929) бол түүний хамгийн алдартай хүүхдийн зохиол юм. Харин Лотте, Луйзе хоёр (1949) ном нь олон орноо дэлгэцийн бүтээл болж гарснаараа дэлхийн мянга мянган хүүхдийн хайртай зохиол болж чадсан билээ. ...охид сэргэлэн нүдээ гялалзуулсаар өөрсдийгөө тольдлоо. Зүс царай нь яг л шинэ жилийн гацуур мод ийм байдаг даа гэмээр гэрэлтэнэ. Усны дусал шиг ив ижилхэн хоёр охин толь руу ширтэнэ. Усны дусал шиг ив ижилхэн хоёр охин толин дотроос мөн ширтэнэ...

Лотте, Луизе хоёр

Осолдож, төөрсөн нисгэгч, эгэлгүй бяцхан хүү хоёрын нөхөрлөлийн үнэ цэнийг өгүүлэх 'Бяцхан Хунтайж' зохиол нь бүх насны уншигчдын сэтгэл зүрхэнд хүрч чадсан юм. Цэцэн мэргэн, ид шидийн гэмээр гайхамшигт энэ ном нь зүрх сэтгэлийн гүн дэх нууцыг өгүүлж, оршихуйн утга учир, хайр энэрлийн хүчийг ойлгуулах болно. Бяцхан хунтайж энэ дэлхий дээр биш, бага гараг Б 216-д амьдардаг байжээ. Тэр гараг нь бургилж буй хоёр галт уул, сөнөсөн нэг галт уултай, бяцхан хунтайжаас арай томхон гараг билээ. Орчлон хорвоод цор ганц байдаг хэмээн итгэж, хайрлан хамгаалдаг цэцгээ орхиод гарсан тэрээр олон гарагаар аялаж ван ноён, худалдаачин, архичин, дэнлүү асаагч, газарзүйч зэрэг хүмүүстэй уулзаж, эцэст нь дэлхийд ирсэн ажээ. Энэ зохиол нь Антуан де Сэнт-Экзюперийн бусад зохиолуудтай огт адилгүй бөгөөд тэрээр тайлбар зургийг нь өөрөө зурсан байна. Зохиолын энгийн, ойлгомжтой дүрслэлийн цаана ёгт, гүн гүнзгий утга агуулга нуугдаж буй бөгөөд хар аяндаа өрөвдөх, хайрлан энэрэх сэтгэлийг төрүүлнэ.

Бяцхан хунтайж

Тиммийн хажууханд зогсох нэгэн хүн түүний хөгжүүн инээдийг сонсоод хүүг анхааралтай ажиглан харах аж. Тэрээр урт эрүүгээ бодлогошронгуй илснээ нэг шийдвэр гаргав бололтой түүн рүү чиглэн ирж, шүргэх шахам хажуугаар нь өнгөрөхдөө хөл дээр нь гишгэчихэв. Тэгснээ “Уучлаарай, хүү минь! Би уг нь зориуд гишгээгүй юм шүү! гэсэнд “Зүгээр, зүгээр. Миний гутал тэртэй тэргүй тоостой...” гэв. Энэ хоромхон зуурын учрал олон адал явдлыг ар араасаа дагуулсаар Тимм Талер буюу худалдагдсан инээдийн тухай алдарт түүх өрнөх болно.

Тимм Талер ба худалдагдсан инээд

Уруугаа ургасан мод нь ид шидийн ертөнцийн олон төрлийн гайхамшигт баатрууд ба ер бусын үйл явдлаар дүүрэн үлгэрчилсэн тууж юм. Зарим утга зохиол судлаач, шүүмжлэгчид Уруугаа ургасан мод туужийг хүүхдийн үлгэрчилсэн тууж гэхээсээ илүүтэй энэтхэгийн нийгмийн кастын давхаргыг шүүмжилсэн ёгт философи утгатай гэж үзэх нь ч бий. Зохиолч номынхоо талаар, эхний удаа уншихад та энгийн нэгэн шидэт түүхийг олж харах ба хоёр дахиа уншвал тэрхүү үлгэрчилсэн зохиолын цаана нуусан миний гол санааг олох болно гэсэн байдаг. Хүн бүрийн дотор бага насны дурсамжууд, тухайн үеийн мэдрэмжүүд насан өөд болох хүртэл нь дотоод сэтгэлд нь нуугдаж байдаг учраас би хүүхдийн ном бичих дуртай гэж номын зохиогч өмнөх үгтээ бичжээ.Аавыгаа нас барсны дараа ээжтэйгээ хоёулаа үлдсэн Иосеф хүү мөргөлд очих дургүй бөгөөд ихэс дээдсийг хүндэлдэггүй гэх шалтгаанаар өлсгөлөнгийн ирмэгт тулдаг. Ийнхүү тэд сүүлчийн хөрөнгө болох үнээгээ зарж хэдэн өдрийн өл залгуулахаар шийдэх боловч Иосеф шуналт хүний башир аргад хууртан мөнгөний оронд “шидэт үр” авч орхино. Үрийг газарт суулгахад, бусад мод шиг өөдөө биш уруугаа мод ургачихсан байх ажээ. Адал явдал цаашид улам сонирхолтойгоор үргэлжлэх болно.

Гайхамшгийн эрэлд - Цахим