Зөвхөн охид гэлтгүй бүсгүй хүний амьдралд тулгарч болох 59 бүлэг асуудлын тухай хөндөж захидал хэлбэрээр бичигдсэн нь онцгой төдийгүй, уншихад нэн ойлгомжтой, ойлгож тунгаах зүйлсээр дүүрэн байх болно. Энэ номоор та охин үрийнхээ дотоод ертөнцийг нээж, харилцан ойлголцож, хайраар дүүрэн амьдралд бэлдэнэ гэдэгт эргэлзэхгүй байна. Охид бүсгүйчүүдэд учирч болох олон эрсдэлээс хамгаалж, туулж гэтэлгэх олон асуудалд нь хүч тэнхээ болно. Өсвөр нас, оюутан ахуй, хайр сэтгэлээр дэвэрч яваа, амьдралын гараагаа эхэлж байгаа бүх охид бүсгүйчүүдийн цүнхний ном байх болно.

Амьдралд бэлэн үү? Охин үр минь...

Залуучууд болон хосуудын харилцааг илүү дотно, илүү ойлгомжтой болгох зорилго бүхий амьдралд тохиолдож болох бэрхшээл, алдаа оноо бүхэнтэй хэрхэн нүүр тулах тухай үргэлж эерэг талаас нь өгүүлнэ. Хайр, хүндэтгэл, итгэл, биесээ хүлээн зөвшөөрөх гэдэг ямар чухал болохыг онцолно.

Амьдралд бэлэн үү? Хайрт минь...

Ачлалт хүү минь өнөөдөр чи тулганы гал, удмын заяа түших үртэй боллоо! Харин чи минь ААВ байх уу, эсвэл ЭЦЭГ байх уу гэдэг нь энэ мөчөөс л харагдана. Магадгүй чи минь энэ хоёр чинь нэг л утгатай биздээ хэмээн гайхаж байж болох! Эцэг гэдэг нь үр удмаа үлдээсэн эр хүнийг хэлдэг. ”Аав“-тай харьцуулахад дотно бус албархуу утгатай юм. Доржийн эцэг, эцэг өвгөд, эцэг мал гэж ярихаас ”Миний эцэг“ гэдэггүй. Миний аав гэдэг шүү дээ. Эр хүн эцэг байх шиг амархан зүйл үгүй. Харин аав байх амаргүй. Үр удмаа үлдээсэн болгон ”Аав“ болдоггүй. Үр хүүхдээ энэрсэн хайрласан, сургасан, өсгөсөн хүн л аав болдог. Аав хүний нөмөр нөөлгийг гүйцэх зүйл энэ хорвоогийн хаанаас ч хайгаад олохгүй байх. Тэдний үг нь хатуу ч өр нь зөөлөн, үйлдэл нь ширүүн ч сэтгэл нь үргэлж үрийнхээ төлөө цохилж байдаг гэдэгт ээж нь итгэдэг. Одоо энэ бүхэн чамд минь ирлээ. Удмыг чинь залгуулж ургийг чинь мөнхлөх үрээ, үрийг чинь төрүүлж үйлийг чинь залруулах эхнэрээ хайрлаарай. Харанхуй шөнөөр хэд дахин босож хөхөө хөхүүлэх түүнийгээ амрааж, үрийнхээ живхийг бариад зогсож байдаг аав болоорой! Зугаа цэнгэл, тоглоом наргианд толгойгоо мэдүүлж, нялх биетэй эхнэрийнхээ сэтгэлийг чилээж, үрээ бүү хөлсрүүлээрэй! Хөл дээрээ тэнцэн алхах үрийнхээ гарыг атгаж дэм бол! Бамбарууш зурлаа гээд баахан сараачаад ирсэн цаасыг нь хараад өхөөрдөн урам өг! Жаахан шүү дээ үр чинь! Чиний л багын хуулбар байгааг одоо анзаарч байна уу? Сургуулийнх нь анхны шинэ жилд, эцэг эхийн хуралд, ангийн уулзалт гээд аав, ээжийн оролцоотой бүхэнд нь заавал очиж байгаарай! Хүүхэд л болсон хойно бусадтай барьцаж, өөрийнх нь аав, ээж ирсэн гэдгийг гайхуулах хүсэлтэй байдаг юмаа тэд чинь. Ядаж л сурсан мэдсэн, үзсэн харсанаа олны өмнө ээж, аавдаа үзүүлж бардамнах хүслээр дүүрэн байгаа шүү дээ үр чинь! Их сургуулийн найзуудад нь анхааралтай байж, болж өгвөл тэдэнтэй нь танилцаж дотносоод, халуун яриа өрнүүлээд нэг үзээрэй. Залуучуудын омогшил, залруулж боломгүй алдаа хийхээс нь сэрэмжилж, хэн нь хэн бэ гэдгийг мэдэж байх нь хамгийн чухал байдаг юм шүү! ”Завгүй байна“, ”Ядарч байна“ гэх үгээр шалтаглаж үрийнхээ сэтгэлийг бүү сэвтээгээрэй. Ямар ч чухал ажил, үртэйгээ ярилцах аравхан хормоос үнэтэй байв гэж дээ! Яаж ч ядарсан байсан үрийнхээ үгийг сонсох тавхан хором хэцүү байв гэж дээ! Асуудалтай болоод л аав аа! гэж царайчлан ирж байгаа шүү дээ! Эцэг, эхчүүд хүүхдээ сонсохгүй болсон цагаас л харилцаа хөндийрч, асуудал үүсдэг юм. Өөрийнхөө хүслийг үрдээ бүү тулгаарай! Эхлээд хүсэл мөрөөдлийг нь сонсчихоод, хөгжүүлэх авьяасыг нь шийд л дээ! Хүчээр эзэмшсэн мэргэжил, хүчээр авсан диплом хүүхдийг ”Хүн“ болгодоггүй. Чи ч бас багадаа хэрхэн ажил мэргэжлээ сонгож байснаа санаарай. Одоо харин чиний ээлж ирлээ хүү минь. Эр хүн аавгүй өсөж ч болох, гэхдээ өөрөө заавал аав болдог. Эр хүн ээжгүй өсөж ч болох, гэхдээ ээж болох эмэгтэйтэй заавал гэрлэдэг. Бүх зүйлд ээлж гэж бий. Нэгэн цагт чи минь өөрөө хүүхэд байсан, гэтэл дараа нь хүүхэдтэй болно. Өөрт дутуу байсан бүхнээ үрдээ хүсэхгүй чинь мэдээжийн хэрэг ч, өөрт байсан зүйлээ үрдээ бүр их байлгадаг ”Аав“ байгаарай. Аав хүн ХАМГААЛАГЧ юм. Аав хүн ДҮҮРГЭГЧ юм. Аав хүн САЙХАН ҮНЭР юм. Аав байна гэдэг их УХААН юм. Аав хүн гэдэг ээжийг нь яаж хайрладгаа харуулдаг ҮЛГЭР ЖИШЭЭ юм. Аав хүн гэдэг НЭР ТӨР юм. Аав хүн гэдэг бүхнийг чаддаг ИЛБЭ ШИДТЭН юм. Аав гэдэг дуусашгүй ТЭВЧЭЭР, дундаршгүй ЭРДЭМ юм. Аав гэдэг хамгийн сайхан АЛДАР юм аа хүү минь...

Амьдралд бэлэн үү? - Аудио (3 бүтээлт цуврал)