Монгол орныхоо эдийн засгийн хөгжлийн шинэ үе шат буюу зах зээлийн эдийн засагт шилжиж эхэлснээс хойших 30 гаруй жилийн хөгжлийн явц, үр дүнг нэгтгэн дүгнэх, ингэхдээ улс төрийн эдийн засгийн ухааны онол, арга зүйг экономикстэй хамтатган хэрэглэх оролдлогыг хийсэн юм. Түүнчлэн аж үйлдвэрийн IV хувьсгал өрнөж, шинэ эдийн засаг үүсэж, хуучин эдийн засгийг шахах үйл явц эхэлж буйг судалж, Монголд шинэ эдийн засгийг хөгжүүлэх талаар санал, бодлоо нэмэрлэхийг зорив. Энэ судалгаанд шинэ тутам үүсэн хөгжиж буй шинэ улс төрийн эдийн засгийн ухааныг ашиглах, түүнийг Монгол оронд дэлгэрүүлэн хөгжүүлэх асуудалд бид онцгой анхаарч байна. Шинэ улс төрийн эдийн засгийн ухаан нь сонгодог улс төрийн эдийн засгийн ухааны онол, арга зүй, макро эдийн засаг болон улс төр, бодлого судлалын зарим онол, урсгалын нийлбэр цогц юм гэж бид үзэж байна. Өөрөөр хэлбэл, шинэ улс төрийн эдийн засгийн ухаан нь сонгодог улс төрийн эдийн засгийн ухааныг орчин үеийн эдийн засгийн болон улс төр судлалын онол, урсгалуудаар баяжуулсан шинжлэх ухаан юм. Бид шинэ улс төрийн эдийн засгийн ухааныг ашиглан Монголынхоо эдийн засгийг илүү нарийн судлах зорилт тавин ойрын жилүүдэд “Монгол Улсын эдийн засгийн асуудлууд” хэмээх 3 боть ном бичихээр төлөвлөсөн бөгөөд эхний боть болох “Монгол улсын эдийн засгийн асуудлууд. Боть 1. Бодит эдийн засгийн салбарууд” хэмээх бүтээлийг уншигч олондоо өргөн барьж байна.

Монгол Улсын эдийн засгийн асуудал

ШУА-ийн Философийн хүрээлэнгийн Философийн салбарын Улс төрийн эдийн засгийн ухааны тасаг 2018 онд анх байгуулагдсанаасаа хойш Монгол Улсад улс төрийн эдийн засгийн ухааныг хөгжүүлэх чиглэлээр ажиллаж, Монголын эдийн засгийн хөгжлийн асуудал /Улс төрийн эдийн засгийн ухаан ба экономиксийн судалгаа/, Карл Марксын Капитал зохиол ба Монгол дахь зах зээлийн харилцаа, Монгол дахь зах зээлийн эдийн засгийн хөгжлийн асуудлууд, Адам Смитийн орол ба эдийн засгийн философи, Хуучин ба шинэ эдийн засаг зэрэг нэг сэдэвт бүтээл бичиж хэвлүүлэв. 2022 онд тус тасаг Бодлого судлал, улс төрийн эдийн засгийн ухааны салбар болон өргөжсөний дараа Монгол Улсын эдийн засгийн асуудлыг иж бүрэн судлах ажлыг эхэлсэн бөгөөд 2023 онд Монгол Улсын эдийн засгийн асуудал-Боть 1, Бодит эдийн засаг хэмээх номыг бичиж, олны хүртээл болгосон. Энэ удаа уг номын II боть буюу Монгол Улсын эдийн засгийн асуудал, Боть 2, Мөнгө санхүү, Улс төрийн эдийн засгийн ухааны шинжилгээ гэдэг номыг уншигч түмэндээ толилуулж байна. Эдийн засагт мөнгө, санхүүгийн салбар том байр суурь эзлэх бөгөөд банкны систем, мөнгө зээлийн харилцаа, төсвийн харилцаа, татварын болон нийгмийн хамгааллын систем, үнэт цаасны зах зээл, банк бус санхүүгийн байгууллага, даатгалын систем, олон улсын банк санхүүгийн тогтолцоо гэх мэт олон институт, системээс бүрддэг. Монгол Улс зах зээлийн харилцаанд шилжиж эхэлмэгц хуучин мөнгө санхүүгийн харилцааг өөрчилж, зах зээлийн эдийн засагт нийцсэн шинэ тогтолцоог бүрдүүлэх чиглэлээр томоохон үсрэлт хийсэн билээ.

Монгол Улсын эдийн засгийн асуудал (2 бүтээлт цуврал)