Чингисийн гүрэн улс дөнгөж өндийн босож байх үед нүүдэлчин ард түмэн ганц хүний хүсэл зоригийг дагаж, захирагдаж сураагүй, түүний үг хууль байх ёстой гэдгийг ухаараагүй байсан цаг билээ. Эрх мэдэл, албан тушаал хуваахад хоосон хоцрохгүйн тулд элдэв хуйвалдаан, далд явуулга их гарч байв. Бие биедээ дайсагнасан элдэв бүлэглэлүүд гарч ирж байсны дотор Чингис хаанаас илүү хүч нөлөөгөө ихэсгэхийн тулд хорон санаа агуулан тэмцэж, хэрүүл маргааныг өдрөөс өдөрт даамжруулах үйлийг хийж явсан хүн бол Хөхөчү бөө буюу Тэв Тэнгэр байв.