4+ настнууддаа зориулсан та битгий уурлаарай хөлөгт тоглоомтой ном. Үсэг цээжлэхэд туслах бяцхан ном

Орчин үед цахим ертөнцийн хөгжил идэвхтэй хөгжиж цагаан толгойн цахим хэлбэрт орж эхэлжээ. Гэвч ирээдүй хойч үе ном сонирхогч, номыг уншиж ашиглаж чадах нэгэн болоход нэмэр болох зорилгоор "Үсэглэл тоглодог ном"-ыг уншигч багачууддаа хүргэж байна. Энэ ном 4-6 насны багачуудын насны онцлогт тохирсон сэтгэхүй хөгжүүлэх, хэл зүгшрүүлэх тоглоомын аргаар 35 үсгийг цээжлэн тогтооход дөхөм болох юм.

Хүүхэд тоглож байгаа хүүхдийг ажиглахад тэд ямар нэг асуудлыг сэдэж, түүндээ хариулт олж шийдвэрлэж байдаг. Тоглох үйлд баяр хөөр, уур уцаар, тэмцэл, бусадтай зохицох, хамтрах, мөн өөрөө бие даан ажиллах зэрэг хүний сэтгэл санаа, үйл хөдлөл, харилцааны бүхий л зүйлс агуулагдаж байдаг. Ийнхүү тоглоом нь зөвхөн хүүхдийн сэтгэхүйн хөгжилд нөлөөлөх бус бие дааж өөрийн үйл, хөдөлгөөнөө удирдан зохицуулах, үзэж харсан, сонсож дуулсан зүйлээ дуурайн давтаж өөрийн болгох, санаа бодлоо илэрхийлэх, бусад хүүхэдтэй тоглоомоо дундаа хэрэглэхээс эхлээд харилцаж сурах гэх мэтээр тэднийг хүн болж төлөвшихөд тал талаас нь нөлөөлдөг. Өөрөөр хэлбэл тоглоом бол бага насны хүүхдийн үндсэн "ажил", суралцах үйл юм.