Бизнес эрхлэгчид цаг үеэ олсон оновчтой, шийдвэр гаргах нь бизнесийн амжилтын үндэс бөгөөд судалгаа шинжилгээнд суурилсан шийдвэр нь амжилтын магадлалыг улам бүр нэмэгдүүлнэ. Аливаа судалгаа нь шинжлэх ухааны онол арга зүйд суурилсан, компанийн өмнө тулгарч буй асуудлыг тодорхойлж, түүнийг шийдвэрлэхэд шаардлагатай өгөгдлийг цуглуулах, боловсруулах, нэгтгэн дүгнэх, шинжилгээ хийх, үр дүнг нь тайлагнах харилцан уялдаа, дэс дараалал бүхий үйл явц юм. Эдгээр харилцан уялдаатай, эрэмбэ дараалалтай үе шат бүрийг нэг бүрчлэн тайлбарлан бичсэн нь уншигч та бүхний маркетингийн судалгааны талаарх онолыг мэдлэгээ болон судалгаа хийх чадвараа ахиулахад тус нэмэр болно гэдэгт итгэлтэй байна. Энэхүү номыг их, дээд сургуулийн оюутан суралцагчид, маркетингийн судалгааны онол, арга зүйд суралцахаар сонирхож буй хүмүүст зориулж, маркетингийн судалгаа хичээлийн үндсэн агуулгын хүрээнд бичлээ. Тус ном нь Маркетингийн мэдээллийн систем ба маркетингийн судалгаа, Маркетингийн судалгааны салбар, судалгааны ёс зүй, Маркетингийн судалгааны үйл явц, Маркетингийн судалгааны дизайн, Хоёрдогч болон синдикат өгөгдөл, Ажиглалтын судалгааны арга, Ярилцлагын судалгааны арга, Туршилтын судалгааны арга, Асуулга боловсруулах арга зүй, хүсэл хандлагын хэмжээс, Судалгааны түүвэр, Судалгааны өгөгдөл цуглуулах арга, хэлбэр, Өгөгдөл боловсруулалт, шинжилгээ, Маркетингийн судалгааны тайлан гэсэн 13 бүлэгтэй бөгөөд МУИС-ийн багш Г.Мөнхбаясгалан (Ph.D), Г.Урандэлгэр (Ph.D), Ч.Батбаатар (Ph.D) нар багшилсан туршлага, хуримтлуулсан арга зүйн материал, зарим судалгаа, мэргэжлийн ном зүйд тулгуурлан бичсэн. Бүлэг бүрийн төгсгөлд тухайн сэдвийн мэдлэгийг бататгах асуулт, сорилыг оруулсан болно.