**Эгэлгүй монгол жаалууд аяллын баг дөрвөн гишүүнтэй. Тэднийг Жак, Базараа, Шагж, Түшиг гэх бөгөөд нэг л өдөр үсээ хусуулсан дөрвөн халзан нөхөр эх орныхоо Дорно зүгийг зорьсон юм. Тэд Экологийн цагдаагийн албаны байгаль хамгаалах элч баг бөгөөд “Ирлээ, явлаа, цэвэр”, “Хогоор бүү хорло!” аяныг эхлүүлэгчид юм. Дорно зүгт хүлгийн жолоо залсан тэд 16 хоногийн хугацаанд 6000км аялж эх орноороо эко аялах уриалгаа амжилтай хүргэсэн. Аяллын багийн гишүүд үгээр урлах, гэрэл сүүдрээр наадах гээд есөн шид нь бүрдсэн нөхдүүд. Эгэлгүй жаалууд зүгээр нэг аялаад ирэхийг хүссэнгүй. Бага хугацаанд их замыг туулсан учир энэ түүхээ ном болгохоор зориг шулууджээ. Шагж Гэлэнгийн инээдтэй хэрнээ егөөтэй, Жакын марзан хэрнээ агуулгатай, Базараагийн энгийн хэрнээ хатгасан, түншсэн аяллын тэмдэглэлүүд Түшигийн мэдрэмжтэй зургуудаас ном бүтсэн аж.**