Энэхүү гарын авлага нь гадаад, дотоодын их, дээд сургуульд элсэн суралцахаар зорьж байгаа ахлах ангийн сурагчдад зориулсан бөгөөд математикийн мэдлэгээ улам дээшлүүлж бататгах, ЭЕШ-д амжилттай бэлтгэхэд нь туслах зорилгоор бичигдсэн юм. Тус гарын авлагад одоогийн дунд сургуульд мөрдөж байгаа математикийн хичээлийн хөтөлбөрийн хүрээнд цаашид дээд математикийг судлахад зайлшгүй шаардлагатай онолын материалуудыг цомхноор багтааж жишээ бодлогоор тайлбарлав. Бие дааж бататгах дасгал бодлогуудыг бүлэг бүрийн төгсгөлд сонгох болон нөхөх тест хэлбэрээр оруулж хариуг хавсаргалаа. Эдгээр бодлогуудыг сонгохдоо дунд сургуульд багшилж 8 удаа анги төгсгөхдөө хэрэглэж байсан конспект, ЭЕШ-д ирж байсан бодлогууд, ``Математикийн сорилго'' хэмээх ном, ``Integral.mn'' сайтын Монгол бодлогын сан зэргийг ашиглалаа. Түүнчлэн номын эцэст Математикийн томьёоны лавлах, ухагдахууны Товъёог зэргийг хавсаргасан нь гарын авлагыг үр дүнтэй ашиглахад тус дэм болно гэдэгт итгэлтэй байна. Гарын авлага маань хоёр хэсгээс бүрдэх бөгөөд I хэсэг нь Математикийн бүхий л салбарын тулгуур болж байдаг олонлог, буулгалт, функц болон математик логикийн онолын анхан шатны ойлголтоор эхэлж байгаа тул эдгээр бүлгийг орхигдуулахгүй сайтар уншиж судалбал бусад ухагдахууныг төвөггүй ойлгоход ихээхэн ач холбогдолтой зүйл болно гэдэгт эргэлзэхгүй байна. Улмаар энэ хэсэгт тоон олонлогууд, элементар функцүүд болон тэдгээртэй холбоотой тэгшитгэл, тэнцэтгэл бишийн тухай авч үзсэн. II хэсэгт хязгаарын онол дээр тулгуурласан математик анализын эхлэл болон комбинаторик магадлалын онолын элементүүд, хавтгайн болон огторгуйн геометрийн ойлголтуудыг багтаасан болно. Ийнхүү номын агуулга дээд математикийн үндэс суурийг агуулж байгаа тул түүнийг судалж байгаа оюутнууд ч ашиглах боломжтой. Түүнчлэн математикийн аливаа ойлголт нь урьд өмнөх ойлголт дээрээ суурилж байдаг учраас суралцагчдаас цэгцтэй мэдлэг, хоцрогдолгүй байхыг шаардаж энэ нь тэднийг амжилттай суралцахад нь шийдвэрлэх нөлөө үзүүлж байдгийг онцлон хэлэх нь зүйд нийцнэ. Энэ номын агуулгыг ч мөн аль болохоор ухагдахуун хоорондын залгамж холбоо, мэдлэгийн өргөжин тэлэх логик дэс дарааллыг алдагдуулахгүй байхыг хичээж хийсэн болно. Гарын авлагад теоремуудын баталгааг тэр бүр авч үзээгүй, учир нь сонирхсон хүн бүр дунд сургуулийн сурах бичгээс олоод үзэх боломжтой, тэгээд ч нэг номын хүрээнд бүгдийг багтаах боломжгүй билээ.