Ардчиллын үйл явцыг явцуу сонирхлын хүрээнээс тайлбарлах, ялангуяа гадны бэлдсэн зүйл байсан гэх зэргээр Монгол оронд өрнөсөн ардчилсан хувьсгалыг харлуулах, түүхийг гуйвуулах оролдлогууд гарах болсон өнөө цагт ардчиллын төлөөх тэмцлийн амин сүнс нь түүнийг дэмжиж ирсэн мянга мянган Монголчууд байсан юм гэдгийг бид мартах ёсгүйгээр барахгүй, түүгээр бид бахархах ёстой. Аливаа үзэгдлийн ард түүнийг хөдөлгөгч хүч оршдогчлон, эрх чөлөөг эрхэмлэж ирсэн өвөг дээдсээс бидэнд үлдээсэн эх орон маань түүхийн нугачаанд гүн нойронд автаад байгааг сануулан биднийг сэрээж , Монголчуудын сэтгэлийн угт ассан хүсэл зоригийг үгээр сийлж, аялгуугаар хөглөн түгээсэн хүн бол яар аргагүй 'Хонх'-ын С.Цогтсайхан байсан юм.