Эрүүл хүн мянган хүсэлтэй, өвчтэй хүн зөвхөн нэг л хүсэлтэй гэдэг. Гэртээ биеийн хэм 40 градус хүрч халуураад, чичрээд хэвтэж байхад үнэхээр эрүүл болохсон гэхээс өөр ямар ч бодол орж ирээгүйгээ би сайн санаж байна. Эрүүл байхад бусад зүйл болж л таараа гэж бодогдоно. Энэ мэдрэмжийг хүн бүхэн сайн мэддэг. Эрүүл мэндийн хэвийн байдал бол бидний амьдралын гол алтан тулгуур суурь. Гэтэл эрүүл мэндийн хэвийн байдал бол бидний амьдралд амар хэвийн олдох зүйл биш билээ. Эрүүл мэнд хэвийн буюу эрүүл мэнд сайн байгаа нь таны бие бас оюун ухаан, сэтгэл зүй эрүүл байгааг хэлнэ. Гэтэл ТА таны бие эрүүл байхдаа миний бие эрүүл саруул байна гэдгийг мэдрэн өөртөө талархалтайгаар бас хүндэтгэлтэйгээр ханддаг уу? Эрүүл хүн мянган хүсэлтэй… “Үнэ цэнэтэй зүйлээ гамнаж хэрэглэ” гэж эмээ маань надад захиж ирсэн билээ. Тэгвэл ТАНЫ хамгийн үнэ цэнэтэй зүйл юу вэ? Унаж буй машин уу, зүүж буй ээмэг бөгж үү, том дэлгэцтэй гар утас уу? Энэ бүхнээ ТА гамнан, тордон, цэвэрлэн, хамгаалалтаар “хувцаслан” ашигладаг.

Гэтэл таны хамгийн үнэ цэнэтэй зүйл бол эрүүл мэнд. Хэрэв тийм биш байсансан бол та өвчтэй байхдаа эрүүл болохсон гэж бодохгүй л байсан байх. Эрүүл мэндээ та гамнан хайрладаг уу? Харин машинаа тогтмол үзлэгт оруулж, тос тосоолыг нь солин, хайрлан торддог мөртөө Та эрүүл мэндээ бодон өөрийгөө тогтмол үзлэгт оруулж, хэрэгтэй шим тэжээлийн дутагдлаа нөхөж хайрлан торддог уу? Мянган хүслийн магадгүй нэг нь л эрүүл мэнд байх. Та болон таны гэр бүл, хайртай хүмүүсийн эрүүл мэнд таны мянган хүслийн хамгийн нэн чухал хүсэл гэдэгт би итгэлтэй байна. Би танд нэг санал тавьяа.

Төсөөлөл: Хэрвээ нэгэн ид шидтэй хүн танд ийм санал тавьбал та юу гэж шийдэх вэ? Эрүүл амьдрал гэдэг зүйл энэ хаалганы ард байгаа танд энэ хаалгыг онгойлгох түлхүүрийг нь атгуулъяа. Та энэ түлхүүрээр онгойлгоод хамгийн чухал хүслээ биелүүлээрэй гэвэл та яах вэ? Онгойлгоод орох уу ТА?

Тэгвэл би хэдий ид шидтэй хүн биш ч, танд таны хамгийн чухал хүслийг биелүүлэхэд өөрийн сурсан, ойлгосон, шинжлэх ухааны үндэслэлээр батлагдсан чаддаг, мэддэг бүхнээ гарт тань түлхүүр болгон атгуулан тусалъяа. Гэхдээ нэг болзолтой. Хэдий түлхүүрээ гартаа атгасан ч түлхүүрээ ашиглан тэр хаалганы цоожийг ТА гардан онгойлгон орохгүй бол тэр түлхүүр ямар ч үнэ цэнэгүй гэсэн үг. Тиймээс та энэ түлхүүрийг өөрийн болгож гардан, тогтмол хэрэглэнэ гэж өөртөө амласан тохиолдолд та энэ номыг уншаарай мөн хэрэгжүүлээрэй. Хэрэгжүүлвэл хариуд нь энэ ном танд тусална гэдэгт би итгэлтэй байна.Хэрэгжүүлэхгүй зөвхөн уншаад өнгөрвөл та түлхүүрээ гартаа атгаад цоожтой хаалганы ард зогсоод л байна гэсэн үг. Тиймээс хэрэгжүүлэх зорилгогүй бол энэ номыг уншаад ч хэрэггүй гэж зөвлөе. Цаг үрсэн дэмий зүйл болно.