Ном уншингаа англи хэлээ сайжруулмаар байна уу? Тэгвэл наашаа суугаад, уншаарай. Англи-монгол хос хэлээр уран зохиолын ном унших боломжийг “Би цуврал алуурчин биш” ном танд олгож байна.

Хүүгийнхээ бусдаас өөр байдлыг хүлээн зөвшөөрөх, ойлгохыг хичээдэг, эсвэл ер нь л бусад шиг огт ойлгодоггүй ээжтэйгээ хамт амьдардаг Жохн гэх өсвөр насны хүү нэг аюултай зан авиртай гэдгээ мэднэ. Тиймээс өөртөө зориулан, өөртөө болон бусдад хор хүргэхээсээ сэргийлэх дүрмүүд зохиожээ. Жохн цуврал алуурчдын тухай донтон судалдаг. Эцэст нь түүнд цуврал алуурчинтай, мангастай, өөртэйгөө тулалдах хэрэг гарна. Харин та хэн нь цуврал алуурчин, мангас, эсвэл Жохн өөрөө болохыг, дүрмүүдээ зөрчвөл юу тохиолдохыг Жохнтой хамт олж мэдэхийн тулд энэ номыг уншиж дуусгах хэрэгтэй. Аа, мэдээж, хос хэл дээр бичсэн учраас үгээр нь биш, өгүүлбэрээр нь үг цээжилж, ном уншингаа англи хэлээ сайжруулмаар байвал таны хэрэгцээнд яг тохирно. Бас зүгээр л айхын тулд ч уншиж болно. Аль ч шалтгаан нь байлаа гэсэн та адал явдалд нь шимтэж уншингаа англи хэлээ сайжруулахын хажуугаар өсвөр насны хүүхдийг томчууд ойлгох, өсвөр насны хүүхдүүдэд өөрийгөө илэрхийлэх, ойлгуулах чадвар ямар их хэрэгтэйг ухаарах нь дамжиггүй. Сүүлийн үеийн залуусын зэрлэг балмад болсныг шогширч, тэдний яасныг нь, өөрсдөө яахаа мэдэхгүй гайхаж хоцорсон хүмүүс уншиж, зарим нэг эмнэлгийн оношийг ч маш энгийнээр илэрхийлсэнтэй танилцаад, хариугаа олж аваарай. Айна гээд, авч уншмааргүй байна уу? Санаа зоволтгүй. Бүр нэг тийм, унтахаар зүүдэнд ороод, сэрэхээр нүдэнд харагддаг хирдхийлгэм үйл явдалтай ном биш, шинжлэх ухааны уран зөгнөлт, аймшгийн зохиол учраас өсвөр наснаас дээш хэн бүхэн уншихад тохиромжтой.