Сайн уу? Найзууд аа.
Та бүхэн “Сайн санааны үзүүрт шар тос” гэдэг
үгийг сонсож байсан уу? Сайхан сэтгэлийн угаас
хийсэн үйл, хэлсэн үгс бүхэн бидний амьдралд
баяр баясал, аз жаргал болон эргэж ирдэг гэсэн
үг шүү дээ. Ножо нь та нартаа хорвоогийн
хамгийн сайхан сэтгэлтэй гурван жаалыг
танилцуулж байна. Бобби, Питер, Филлис гурав
бол бусдад туслахыг чин зүрхнээсээ хүсдэг
эгч дүүс билээ. Хэдий өөрсдийнх нь амьдралд
гуниг зовлон тохиолдсон ч бусдыг аз жаргалтай
болгохын төлөө эр зориг, хөлс хүчээ шавхах
нэгэн түүх эхэлж байна.
Зөвхөн хүүхдийн л хэлж мэдэх гэнэн цагаан,
гэнэ сэргүй үгсийг та унших болно. Хүүхдийн
сэтгэл хэчнээн эмзэг мэдрэмтгий, хиргүй
тунгалаг, уужим хийгээд хүчирхэг гэдгийг
мэдрэх буюу. Сайхан сэтгэлээр эхлүүлсэн
үйл бүхэн бүтэлгүйтлээс ангид оршдгийг,
эрин үеийнхээ талархлыг хүлээж олон хүний
амьдралыг өөрчилдгийг өгүүлнэ. Энэ номон
дотор маш олон төрлийн нулимс бий. Гунигийн
нулимс, цөхрөлийн нулимс, гэмшлийн нулимс,
харууслын нулимс, айдсын нулимс... Бас
баярын нулимс, талархлын нулимс. Залуу
ноёнтон, хүндэт авхай таны өмнө бид гагцхүү
баяр талархлын нулимсан дунд хүүхдийн итгэж
ядан цангинасан дуу сэтгэлд цуурайтсаар
төгсөх амь халуун түүхийг эхлүүлж байна.
“Түүхийн аль ч цагт муу муухай зүйлс
хүчирхэг, хэзээ ч дийлдэхгүй мэт байдаг ч
эцэстээ зөвхөн сайн сайхан зүйлс ялдаг” хэмээх
үгээр таныг төсөөллийн орон зайд замчилъя.
Хүндэтгэсэн: Үүрд чиний үнэнч найз Ножо