Уур хилэн бол аллагын түүх. Гэхдээ бидний мэддэг аллагын түүх шиг биш. Хайрын түүх ч байж болох юм. Холливудын бараг хамгийн алдарт жүжигчин Лана Фаррар Грекийн арал дээр амрахаар шийдэн гэр бүл, жүжигчин, зохиолч найзуудаа дагуулан долуулаа Английн бүрхэг цаг агаараас дайжин явна. Хүүрнэгч буюу зохиолын гол баатар болох Эллиот Ланагийн сайн найз, жүжгийн зохиолч. Арал дээр болсон үйл явдлуудыг жүжгийн зохиолын хэв маягаар зохиомжлон толгой эргүүлэм, огцом эргэлтүүдээр дүрсэлсэн. Эллиот Лана хоёрын хүүхэд насны сэтгэлзүйн гэмтэл, тэдгээр нь одоогийн амьдрал, гаргах шийдвэрүүдэд хэрхэн нөлөөлж байгааг харуулна. Эцэст нь хайртай хүнээ алах хэмжээний уур хилэн хаанаас гарч ирдэг вэ гэдгийг сэтгэлийн гэмтэл шарх, хүний дотор цоожлогдсон дотоод хүүхдээр илэрхийлжээ.