Долоон ханлигийн морьтон баатар
Долоон ханлигийн морьтон баатар
Хаан ширээний тоглоомоос нэгэн зууны тэртээх Вэстросоор хэрэн хэсүүчилсэн эрсийн түүх оршив... Тирион Ланнистер, Подрик Пэйн нарын алдар цуурайтахаас урьтаж Данк, Өндөг хоёр шуугиулан явжээ. Бага залуу, гэнэхэн тэнэг хэдий ч эр зоригоор бялхсан хэрмэл морьтон Өндөр хэмээх сэр Данкан мэдлэг туршлагатайдаа биш ч, мундаг том биетэйдээ хэн ч бай дээрээс нь харна. Түүнийг хормойдон Өндөг нэрт өөдөсхөн хүү хий хийнэ. Өндөг хүү үнэн хэрэгтээ нэг л өдөр сэнтийдээ заларч, титмээ зүүх Эйгон Таргариен гэдгийг таарсан бүхнээсээ нууцлах хэрэгтэй. Энэ л жигтэй хоёр нөхөр гайхалтай ирээдүй өмнөөс нь тосон айсуйд итгэн хувь заяагаараа хэрэн хэсэх замд хүчирхэг дайсан, эзэд ноёдын далд явуулга, хэрээс хэтэрсэн дарлал мэтийг үзэх аж.
Ийнхүү Долоон ханлигийн морьтон баатар хэмээх эл бүтээл Жорж Р.Р.Мартины алдарт бүтээл Гал мөсний дуун цувралын өмнө Таргариены угсаа төмөр сэнтийг эзэгнэж, сүүлчийн лууны сэрүүн дүр маруул ардын ухаанаас арилж балраагүй цагийн үйл явдлыг үнэнээр өгүүлэх гурван бэсрэг туужийг нэгтгэн уншигч олныхоо гарт хүрч байна. Түүнчлэн өнөө цагийн, үлгэрийн ертөнцийг үнэн зөвөөр чадварлаг буулгадаг алдарт зураачдын нэг Гари Жианнигийн зуун жар гаруй бүтээл уншигч олныхоо сэтгэл зүрхийг эрхгүй долоон ханлигт хөтлөн оруулах замыг дурайлгажээ.
Publishers Weekly
Мартины үнэнч шүтэн бишрэгчдийн заавал унших ёстой ном... цувралын бусад номуудаас ялгарах хүний амьдралд таарах даваа нугачаа, баялаг түүх болон хүрээлэн буй ертөнцийг өнгөлөн дүрсэлсэн гайхалтай удиртгал.
Kirkus Reviews
Сэтгэл булаам... Толкинд “Силмариллион” байдгийг санагдуулам Мартинд суурь түүхүүдийг өгүүлэх ийм бэсрэг гурвал бий. Эдгээр түүхүүд юунаас ч үл хамааран маш их амжилтын хамт илүү ихийг хүсэн хүлээх уншигчдын сэтгэлийг өөрийн богож чаджээ.
Booklist
Мартины бүтээлүүдээс хүний амьдралын нарийн нандин мэдрэмж бүхнийг шимтэн унших дуртай уншигчид энэхүү гурван бэсрэг туужийг нэг дор цуглуулж, шинэ амь оруулсан номд туйлын их шимтэхээс гарцаагүй биз ээ.
Bustle
Жорж Р.Р. Мартины туурвисан хамгийн хайр татам хоёр гол дүрийн түүхийг өгүүлэх, жинхэнэ үлгэрлэг адал явдал.
Tech Times
Энэхүү түүврийг унших гол шалтгаан гэвэл ердөө л гайхалтай түүх, түүнийг өгүүлсэн арга барил. Мартин маш ховорхон авьяас, арга барилаар бүхэл бүтэн амьд, амьсгаатай ертөнцийг бүтээжээ.