Зохиолч Михайл Булгаковын "Мастер Маргарита хоёр" роман нь дэлхийн даяарх сая сая уншигчдын хайр хүндэтгэлийг татсан бүтээл мөнөөсөө мөн билээ. Дэлхий дахинаа "Сод бүтээл" хэмээн өргөмжлөгдсөн эл номоос сэдэвлэн кино, телевизийн цуврал, дуурь, симфони төдийгүй рок дуурь бүтээгджээ. 1930-аад оны үед Москвад ирж, бүгдийг байлдан дагуулсан ад чөтгөр болон түүний бараа бологсод, Иудейн прокуратор морьтон Понтий Пилат, ядуу философич Иешуа Га-Ноцри, авьяаслаг боловч хөөрхийлөлтэй Мастер, түүний үзэсгэлэнтэй хайрт бүсгүй Маргарита нарын түүх яагаад номд дурлагчдын анхаарлыг өнөөг хүртэл татсаар байгааг та тус номын хуудас бүрд байгаа гайхам түүхээс мэдэх боломжтой.