"Сэтгэл зүйн триллер" төрлийн бүтээл бөгөөд бодит амьдралаас сэдэвлэн бичсэн билээ. Уг бүтээлдээ шингээж өгсөн санаа минь номын нэрд оршиж байгаа юм. Хүн бүр амьдралынхаа туршид зөв буруу гэсэн хоёр сонголтын өмнө нүүр тулдаг бөгөөд амьдрал өөрөө сонголт юм гэхдээ аль нь зөв, аль нь буруу гэдгийг тухайн үед бүрэн мэдэх боломжгүй байдаг бөгөөд ихэнх тохиолдолд буруу хаалгыг татсан байх нь элбэг. Тухайн хаалгаар орсон хойноо л хүн буруу юу? Зөв үү? гэдгийг мэдэх боломжтой байдаг нь харамсалтай. Цаг хугацаа зөв буруугийн дэнслүүр болж сонголтууд өөрчлөгдөж болно. Зөв гэж бодсон нь буруу болж буруу нь зөв болж байдаг, тиймээс ч аливаа зүйл харагдаж байгаа шигээ байдаггүй. Үр хүүхдийн эхийгээ гэх цагаахан сэтгэлийг хар сүүдэр нөмрөн авч байгаа мэт хаалттай хаалганы цаадах нууцхан амьдралын талаар онц сонирхолтой үйл явдал, эмэгтэй хүний сэтгэл зүйн гэмтэл, эх үрийн холбоо, үерхэл нөхөрлөлийн ээдрээт урт харгуй энэхүү номд маань гарах бөлгөө.