“Гэдэс” ном хэвлэгдэж, олон улсын бестселлер болсноос хойш дэлхийд гэдэс, тархитай холбоотой маш олон судалгаа хийгдэж, сонирхолтой үр дүн гарч, шинэ шинэ нээлт ч хөвөрсөөр байна. Сэтгэл зүйд нөлөөлдөг, тэр бүү хэл сэтгэл гутрал гэх мэт өвчний эсрэг үйлчилж мэдэх гэдэсний бактериудыг судалдаг “психобиотик” гэх ойлголт цоо шинээр бий боллоо.

Амьдрал хэчнээн аятайхан байлаа ч сэтгэл санаа яагаад ч юм тавгүйтчихдэг. Стресстэх, сэтгэл санаа хямарсан үедээ зөвхөн гадаад нөхцөлийг төдийгүй биеийнхээ дотоод орчныг бас анхаарч үзэхийг номын нэмэлт бүлэгт онцолжээ. Түүнчлэн ямар нэг юм идмээр, эсвэл уумаар санагдах үед бие маань тэр зүйлийг яагаад хүсэж, нэхэж буйн учрыг мэдэж авбал тустай бөгөөд сонирхолтой биш гэж үү? Исгэлэн амтыг хүсэхдээ бид үнэн хэрэгтээ ашигтай бактериуд эрж хайдаг юм биш биз? Энэ талаарх сүүлийн жилүүдэд гарсан шинэ сонирхолтой нээлт болон байцай даршлах гэх мэт жорыг сурч, гэдсээ эрүүлжүүлж, сэтгэлээ эмнэхийг хүсвэл тус номын шинэчлэгдсэн хувилбарыг сөхөөрэй.