Ирээдүй бол энгийн нэгэн ахлах сургуулийн сурагч. Тэр спортоос хол, волейболд ямар ч сонирхолгүй нэгэн. Гэвч түүний зүрхийг булаасан Гэрэлцэцэг хэмээх үзэсгэлэнт охин зөвхөн волейболын тамирчдад татагддаг гэдгийг мэдэх үед түүний амьдрал орвонгоороо өөрчлөгдөнө.
Ирээдүй түүнийг өөрийн болгохын тулд волейболын замналаа эхлүүлэхээр шийддэг. Гэвч энэ спорт хичнээн хүнд хэцүү, тэвчээр шаардсан болохыг тэр төсөөлсөнгүй. Энэ аяллын туршид тэр багийн итгэл найдвар, нөхөрлөлийн хүч, ялагдал, ялалтын үнэ цэнийг ойлгож эхэлнэ. Гэрэлцэцэгийн хайрыг татах анхны зорилго нь түүнийг волейболд чин сэтгэлээсээ дурлуулахад хүргэдэг.
Тэрээр ИРЭЭДҮЙН шилдэг тоглогч болж Гэрэлцэцэгийн зүрх сэтгэлийг өөртөө татаж чадах уу? Эсвэл энэ аялал түүнийг огт өөр зүг рүү хөтлөх үү?
“Ирээдүйн Спайк” – Зорилго, хүсэл мөрөөдөл, хайр, спортын гайхамшгийг өгүүлэх сонирхолтой мангаг хүлээн авна уу!
“Ирээдүйн Спайк” нь волейболын сэдэвтэй манга (комикс) ном бөгөөд спорт болон манга сонирхогч өсвөр үеийнхнийг холбосон Монголын анхны спортын манга гэдгээрээ онцлогтой.
Уг бүтээлийг “Бонго”, “Бумбардай”, “Хандгай” зэрэг комикс, анимейшн бүтээдэг Эконтэ ХХК эрхлэн гаргаж байна. “Ирээдүйн Спайк” манга нь 2027 онд Монгол Улсад волейболын спорт хөгжиж эхэлсний 100 жилийн ой, Монголын Волейболын холбоо байгуулагдсаны 70 жилийн ойг тохиолдуулан нийт 12 цуврал манга ном, дагалдах бүтээгдэхүүн, анимейшн бүтээл гаргахаар зорин ажиллаж байна.