Монголчууд бидэнд мөнхийн хөрш Орос улсаа, тэр дундаа эдүгээгийн ОХУ-ыг ойлгох, тус улсын хаяа зэрэгцсэн хөршүүдтэйгээ хэрхэн харилцаж буйг сайтар судлах нэн чухал шаардлага бий. Харин Орос улсын хөршүүдтэйгээ харилцах харилцааг ойлгохын тулд ойрхны жишээ, Украин улстай өрнүүлж буй зөрчил тэмцэл, дайн дажных нь ардах улс төрийн нөхцөл байдал болоод түүхэн учир шалтгааныг сонирхон судлах нь зүйн хэрэг. Чухам эл шаардлагаар бид энэ дайны халуун цэг дээр буюу Орос, Украины хилийн бүс Донбасст улс төрийн зөрчил тэмцэл яаж шуухан өрнөж, тэр дунд жирийн украйн, жирийн орос ардын амьдрал хэрхэн үргэлжилж буй талаар дотроос нь уудалж, ухаж бичсэн нэн орчин үеийн нэгэн гойд зохиолыг та бүхэндээ хүргэж байна. Урьд нь хөдөлмөрийн аюулгүй байдлын байцаагч байгаад эдүгээ зөгийчин болсон Сергей Сергеич бол хэдэн зөгийдөө тоос цуглуулах тайван бэлчээр олж өгөхөөс илүүг үл хүсэх, жирийн номхон иргэн. Гэхдээ Сергеич байнгын суртал ухуулга, түрэмгийллийн халуун гал дунд хуйхлагдан буй Украинд амьдардаг хүн. Зөгийнүүддээ цэцгийн тоос цуглуулах бэлчээр олж өгөх гэсэн энгийн хэрэгцээ нь түүнийг бүс нутгийн улс төрийн мөргөлдөөний хамгийн халуун цэг рүү хөтөлж, хилийн хоёр талаас бие бие рүүгээ давшлан буй салан тусгаарлагчид, Оросын булаан эзлэгчид болоод Крымийн татааруудын дунд хутгалдахаас аргагүйд хүргэнэ. “Саарал зөгийнүүд” бол эдүгээ дэлхийн улс төрийн зөрчил мөргөлдөөний хамгийн эмзэг цэг болоод буй Орос, Украины зөрчлийг халуун шугамаас нь уудлан бичсэн, чингэхдээ уран сэтгэмж, бараан хошигнол, гашуун егөө сэлтээр мөнхүү зөрчлийн наад цаадхыг ухахдаа ухаж, эерүүлэхдээ эерүүлж чадсан тун онцгой бүтээл юм. Эдүгээ бүтээлүүд нь дэлхийн дөч гаруй хэлнээ орчуулагдаж, жар гаруй оронд хэвлэгдээд буй Андрей Курков нь Украины хамгийн нэртэй романч төдийгүй орос хэлтний орчин цагийн уран зохиолын гарамгай төлөөлөгчдийн нэгд зүй ёсоор тооцогдох туурвигч билээ.