Хуульчийн гэр бүлд төрсөн Эдгар Аллан По нь Америкийн богино өгүүллэгийн нэрт зохиолч, яруу найрагч, утга зохиол шүүмжлэгч, урлагийн онолч билээ. Эцэг эх нь бага насанд нь өөд болж, тэр бээр айлд үрчлэгдэн, зүрхний өвчтэйн дээр хорь хүрээгүй наснаасаа мэнэрүүлэгч эм хийгээд сархдын төрлийн ундаанд орж, үүнийхээ нөлөөгөөр хий юм харж, хар харанхуйн ертөнцтэй сэжим холбогджээ. Гүн ухаан, адал явдал, тарчлаан тамлаан, гэрэлгүй ертөнцийн буг чөтгөрүүдийг сүлэн зохиол бүтээлээ туурвисаар 1849 оны аравдугаар сарын долоонд дэргэдийн хэн ч үгүй тарчилсаар сүүлчийн амьсгалаа татсан юм.
Эдгар Аллан По нь детектив зохиолын эцэг гэгдэхээс илүүтэйгээр мэдрэгдэх зүйл нь түүний гүн ухааны эсээг уншихуй ар нуруугаар хүйт дааж хөлс чийхран хилэн хар далавчаа дэвээд цусаа савируулан нисэж үхэгсдийн дундуур яваа хэрээний тухай, эсвэл сэтгэл доторх аль нэг эрхтнээс цус шүүрч буй мэт өвдөлт зовиур нь чинээндээ тулсан үхлийн тухай, бурхдын тухай өгүүлэх гоц ухаантнуудын ганьхарч дууссан эцсийн үг мэт алгуурхан хэрчих, зүрх догдлом адал явдал хийгээд ертөнцийнх бус мэт үйл дэх аймшигтай үнэн, этгээд гажууд жигтэй зүйлсийн тухай тунхаглана.