Чингис хааны яруу алдрын тухай, түүний сүр жавхлан хийгээд амьдрал замналын талаар өгүүлсэн түүхэн судар ном, эх сурвалж, тэрчлэн орчин цагийн бүтээл туурвил, судалгаа шинжилгээ үлэмж их байдаг билээ. Их Хааны намтар цадиг яндашгүй ялгуусан юм болохоор тэгэхээс ч яах билээ. Хааны тухай бичигдсэн судлагдсан нь арвин боловч, эл их хүмүүний үнэн бодит дүр төрх, харагдах үзэгдэх байдал ямарханбайсныг оноон үзэх судалгаа өнөө ч баримт, логик гаргалгаа, үндэслэл шаардсан хэвээр. Тиймээс элдэв оршлыг орхигдуулан энэ тухайд лавшруулан авч үзэж, эл хөргийн судалгаа болон Их хааны үнэн бодит дүр төрхийг түүхэн сурвалж, эх баримт, бусад арга зүйд түшиглэн илрүүлэхээр хичээнгүйлснээ толилуулья. Монголчууд эртний хаадынхаа дүрийг цаас, хив торгон дээр гэхээсээ илүү хад чулуун дээр зурж сийлэх нь элбэг байсан гэж үздэг судлаачид цөөнгүй бий. Ялангуяа Орос. Зөвлөлтийн мэргэжилтнүүд ийм зам шугамыг баримталдаг. (Тэр бүү- хэл сүүлийн үед 'Тэр үеийн монголчууд бол өнөөгийн монголчууд биш. Нэрийг нь зээлдсэн улс байгаа юм. Чингис хааны үр хойч бол бүр ч биш' гэсэн зүйлийг оросууд их тархаах боллоо. Судлаачид маань ном бүтээлээрээ хариу өгсөөр байгаа ч төрийн хэмжээнд хариу үйлдэл үзүүлэхгүй байгаа нь арай зөвшөөрсний шинж биш байлтай.) Хад чулуу, хана туурган дээр үлдээсэн дүр дүрслэл, чулуун баримал Юань Улсын үеийн хаад, хатдын хөрөг болон 'Хубилай хаан гөрөөлж буй нь' тэргүүт түүхэн зургуудаас тооны хувьд хавьгүй илүү санагдсанаас тэгж үздэг байсан биз. Ер нь чулуун урлал бол манай түүх соёлын хосгүй нандин өвийн тоонд зүй ёсоор орно.