Болжморын ёс хүнийхтэй ав адилхан. Нас гүйцсэн эрэгчин, эмэгчин богшрогонууд номд бичигдсэн мэт юм юмны тухай мэдэмхийрэн жиргэдэг уйтгартай шувуухайнууд бөгөөд харин залуус нь санааны зоргоор амьдардаг ажээ. Урьд нэг цагт Бүүдиг гэдэг шар завжит богшрогохон байжээ. Халуун усын байшингийн гэгээвчийн дээд эрэвгэр янз модны цаана хөвд хялгас, алив зөөлөн эдээр барьсан дулаахан үүрэндээ суудаг байжээ. Нисэж хараахан үзээгүй ч сая ургаж байгаа живрээ хэдийн дэрвэж үзсэн тул үүрнээсээ шомболзон юм болгоныг гэлбэлзэн хардаг байв. Энэ нь хөрст алтан дэлхий гэж юу байдаг, түүн дээр амьдарч чадах эсэхээ бушуухан үзэхийг мөрөөдсөнийх байжээ...