1960-аад оны сүүлчээр Английн монголч эрдэмтэн Онон Өргөнгөөг Биндэрт зочлуулахад С.Эрдэнэ гуай нутагтаа амарч явж таарсан байна. С.Эрдэнэ, Б.Нямаа нарын зохиолчид сум, нэгдлийн удирдлагууд Онон Өргөнгөөг Онон мөрний хөвөөнд хүлээн авч үдийн зоог барихад Онон Өргөнгөө Ононы дунд очиж зогсоод, 'Чамдаа л гэж ирлээ. Олон жил мөрөөдсөн юм. Энэ биений минь эд эс бүхэнд Онон минь уусан шингэж харь холд туйлдсан биеийг минь сэргээж өгөөч!' гэж уйлж байхыг хараад энэхүү өгүүллэгийг бичих санаа төрсөн хэмээн ярьсан байдаг. Сүүлд орчуулагч Балдоржийн Цэрэндашийг Онон Өргөнгөө гэртээ хүлээж аваад хуучлахдаа, 'Онон мөрний рашаантай ус биеийг минь эв эрүүл болгож сэргээсэн шүү' гэж бахархан ярьжээ. С.Эрдэнийн 'Амьдралын тойрог' романд хүнд өвчинд нэрвэгдсэн хүмүүс нутгаа, Ононгоо зорьж очиж байгаа тухай гарна.