Номын зохиогч Ш.Болдбаатар нь гамшгийн эрсдэлийн менежментийн салбарын ажлын болон эрдэм судлалын талаар мэргэшсэн, үндэсний болон олон улсын хэмжээнд хүлээн зөвшөөрөгдсөн тэргүүлэх мэргэжилтэн, дадлага туршлагатай судлаач, эрдэмтэн юм. Уг бүтээлд доктор Ш.Болдбаатар байгалийн аюулт зудын эрсдэлийг бууруулах менежментийн онол, арга зүйн асуудлыг орчин үеийн гамшгийн менежментийн онол, арга зүйн хүрээнд анх удаа судалсан байна. Тэрээр зудын эрсдэлийн менежментийн онол, арга зүйн үндэс болон зудын улмаар улс орны нийгэм, эдийн засгийн салбаруудад ялангуяа мал аж ахуйн салбарт учирч болох эрсдэлүүдийг системийн оршин байх хязгаарын хүрээнд үнэлж тэдгээрийг бууруулах арга хэмжээний менежментийг тодорхойлсон байна. Тухайлбал, мал, аж ахуйн салбарыг нэг бүхэл бүтэн систем гэж үзээд түүнийг оршин байх зохистой аюулгүй байдалд байлгахын тулд критик заагийг давуулахгүйгээр хүлцэх хэмжээнд нь барьж байх зудын хүлцэх эрсдэлийн үнэлгээг гүйцэтгэж эрсдэлийг бууруулах арга хэмжээг авахын чухал болохыг илрүүлжээ.