Монгол орон нүүрсний ихээхэн нөөцтэй дэлхийн 20 орны нэг. Нүүрс зөвхөн түлш биш боловсруулах аж үйлдвэрийн нэн чухал түүхий эд учраас манай улсын геологи, хими, түлш, эрчим хүчний эрдэм шинжилгээний байгууллага, химич эрдэмтэд нүүрсний судалгаанд багагүй анхаарал тавьж иржээ. Уг номын зохиогч Ж. Дугаржав 1968 онд МУИС-ийн химийн салбарыг төгссөн ба 1984 онд химийн ухааны докторын зэргийг хамгаалсан. 1975 оноос эрдэм шинжилгээний ажил эрхэлж ШУА-ийн Байгалийн нэгдэл, Хими, хими- технологийн хүрээлэнгүүдэд өнөөг хүртэл микробиологи, нүүрс, гумины бодисын хими- технологи, биологийн идэвхт чанар, хэрэглээний онол, практикийн асуудлуудаар ажиллаж ирсэн. Тэрээр 'Нүүрсний хими, технологи' чиглэлээр бичсэн судалгаа, шинжилгээний бүтээлийнхээ дээжээс эмхтгэн та бүхэнд толилуулж байна.