Монгол улсын урлагийн гавьяат зүтгэлтэн зураач П.Цогзол нь манай анхны мэргэжлийн кино зураач, байгаль, аж байдлын сэдэвт уран зургийн нэрт төлөөлөгч юм. Тайз дэлгэцийн урлагийн их мастерууд 'Жижиг дүр гэж байдаггүй, харин муу тоглосон дүр гэж байдаг. Дүр жижигдэхгүй' гэж онцолдог бол уран зургийн бүтээл нь мөн хэмжээ, сэдвийн цар хүрээгээр хэмждэггүйг дэлхийн урлагийн түүхэнд сор болж тодорсон судалбар зургийн гайхамшигтай бүтээлүүд харуулдаг. Тэгвэл урлагийн сайхныг мэдэрч бас өндөр төвшинд бүтээж чадсан тэр л бүтээл жинхэнэ их туурвил болдогийг зураач П.Цогзолын судалбар зураг, аж амьдрал, нийгмийн байдлыг тусгасан уран бүтээлүүд харуулж байна. Уран зураач П.Цогзол нь XX зуун, шинэ зууны эхэн үеийн монгол амьдралын дүр байдлыг кино урлагт, уран зургийн дэвсгэрт дээр зураглан мөнхөлсөн нэрт уран бүтээлч билээ.