"Морин уруул” роман нь Монголын нийгмийн амьдралын нэгэн зуун жилийн түүхэнд тохиолдсон онцлог, содон үйл явдлыг зохиолын дүрийн сэтгэл зүйгээр дамжуулж, ухамсрын урсгалаар хүүрнэн өгүүлсэн зохиол юм. Тэгэхдээ үйл явдалд оролцоотой байсан түүхэн хүний дурсамж, гэрчлэлээр бус эгэл хүний бодол, эргэцүүллээр дамжин өгүүлэгддэгээрээ анхаарал татдаг. Зохиолд алс хөдөө нутгийн багийн хүний эмч Дэгмид хэмээх өвгөжөөр эр оногдсон ажил албаа залгуулан явах зуураа өөрийн амьдрал, залуу насны хайр дурлал, нийгэм цаг үеийнхээ хувьсал хөдөлгөөн, ойр дотнын хийгээд огт танихгүй хүмүүсийн тухай үргэлжид бодолд автах бөгөөд зохиолын үйл явдал ч түүний бодолд өрнөнө. Тиймээс хүн бол бодлын амьтан, амьдралынх нь дийлэнх хугацаа бодлын ертөнцөд өнгөрдөг гэсэн санааг өгүүлдэг ч гэж хэлж болно. Мөн зохиолд хувь хүний амьдралын тухай дурсамж, нийгэм цаг үеийн эргэцүүллүүдтэй зэрэгцэн хорвоо ертөнцийн танигдашгүй, таашгүй сонин хачин зүйлс сүлэлдэн өгүүлэгддэг билээ.