Монголчууд бидэнд дэлхий ертөнцөд гайхуулахаар өөр хаа ч байхгүй соёлын асар их өв бий. Манай ард түмэн үр хүүхэд хойч үедээ биет бус соёлын өв болох үндэсний уламжлалт ардын гар урлалын дуусашгүй өв сангаас зааж сургаж, түүний арга ухааныг буухиалан дамжуулж ирсэн билээ. Нутаг нутгийн онцлогоос хамааран хувцас, эд юмсыг зохион бүтээх, урлах, чимэглэх арга нь өөр өөр байдаг. Энэ язгуур уламжлалыг үр хүүхэддээ зааж ирсэн ахмад урлаачдаас судлан, уг номын зохиогчид өөрсдийн олон жилийн хөдөлмөрийг шингээсэн 'Хөөрөгний даалин хийх арга' ном бүтээсэн нь хүмүүсийн хэрэгцээ шаардлагаар гарч ирсэн, эхлэн суралцагсад, уран хатгамал, даалин урлаачдад гарын авлага болохуйц бүтээл болжээ. Номын нэг онцлог нь даалингийн булан, ам, голд оёх хээ угалзыг хэрэглэгчид шууд буулган авч даалин дээрээ оёж болохоор, машстаб 1:1 хэмжээтэй зурсан нь хээ угалзыг хайх, хүнээр зуруулж цаг алдахгүй ач холбогдолтой болсон байна. Мөн зарим урчуудын бүтээлээс тусгаж өгсөн нь тэдний бүтээлээс харж суралцах, өнгө зохицол, оёдлын гоо сайхнаас мэдэрч, өөрийн бүтээлдээ тусгах боломжийг олгосон байна.