Хайртай охиноо алдаж уй гашууд унаснаас нь хойш чилийсэн зургаан жил хөврөн оджээ. Түүнд гоолиг сайхан бие, сайн нөхөр, дуртай ажил, тохилог гэр орон, хангалттай орлого, ер нь үр хүүхдээс бусад юм бүхэн бий. 'Амьдрал хэзээ ч тэгш байдаггүй. Өнгөрсөн, алдсан бүхнийхээ хойноос гашуудсаар суух юм бол амьдрал утгагүй. Өнөөдрөөрөө л амьдарцгаая' гэж Алтай түүнд хэлдэг юм. Охиноо алдсанаас хойш нэг хэсэг Саяанагаасаа өөр хүүхдийг хайрлана гэдэг нь голоос хайртай охиноосоо урвасан хэрэг мэт санагдах тул Солонго дахин хүүхэдтэй болох тухай бодохоос ч айдаг байв. Он цагийн урсгалд уй гашуу элсээр дахин үр хүүхэдтэй болох сон гэж туйлаас хүсэх болсон сүүлийн хэдэн жилд хясах мэт үр хүүхэд огт заяахгүй байв. Солонго даатгалын эдийн засагч мэргэжилтэй, орос англиар сайн ярьдаг бүсгүй. Компанидаа хэлтсийн даргаар ажилладаг Улаанбаатарын унаган охидын нэг ажээ...