Эртний төрт улсын үеэс цэргийн хүн төрийн төлөөлөгч болж ирсэн бөгөөд түүнийг батлан харуулах хэдэн зүйлийн нотолгоог хүмүүн төрөлхтөн бодож олсны нэг нь цэргийн хувцас билээ. Цэргийн хувцас үүссэн түүх нь дэлхийн улс орнуудад цаг хугацаа, загвар бүтцийн хувьд өөр өөр боловч агуулгын хувьд нэгэн адил ажээ. Аливаа улсын цэргийн хувцас нь өөрийн цэргийг дайснаас ялгах, жанжин дарга нарыг буодаас нь ялгаруулан төр улсын төлөөлөгч болохыг илэрхийлэх хэрэгсэл болсоор ирсэн. Одоогоос 2200 гаруй жилийн өмнө үүссэн Хүннү гүрний үед аравт, зуут, мянгат, түмтийн дарга захирагч нарыг бусдаас ялгах эвэрт дуулга, хуяг хэрэглэж эхэлсэн түүхтэй. Эрт цагаас Монголчууд дайн байлдаанд эрэлхэгээр оролцсон гавьяа зүтгэлтэй жанжин, баатар эрчүүдэд язгууртны цол хэргэм болон алт, мөнгөн хуяг, дуулга, сэлэм, зэр зэвсэг шагнаж урамшуулж иржээ. Цэргийн дүрэмт хувцасны түүхийн хөгжилт нь нийгмийн хувьсал өөрчлөлт, орон зай, цаг хугацаа, зэр зэвсэг, байгаль орчин, цаг агаар, гүйцэтгэж буй үүргээс шалтгаалан өөрчлөгдөж улам боловсронгуй болсоор ирсэн байна. XX зуунд дайн, байлдааны ажиллагаанд маневр, тактикийн болон техникийн өөрчлөлт, шинэчлэлтэй уялдан олон төрлийн хувцас, хэрэглэл шинээр бий болсон. Дэлхийн I дайн болон II дайны үед олон төрлийн нисэх онгоц, танк, өөрөө явагч их буу, пулемёт, миномёт зэрэг нарийн хараа, тусгалтай зэр зэвсэг нэвтэрч эхэлснээр байлдааны талбарт хуучин хаант засгийн үеийн гоё хээнцэр, хурц тод хувцас хэрэглэхээс татгалзаж эхэлжээ. 1918 оноос хойш Европын болон дэлхийн олон орны армийн цэрэг дайчдын дүрэмт хувцас нь газар орны онцлог, байгаль орчны нөхцөлд тохиромжтой, өнгөлөн далдлалтын ногоон, ногоовтор саарал, бор хүрэн өнгөтэй болж хувирсан байна. Орчин цагийн цэргийн дүрэмт хувцас нь цэрэг стратегийн чухал ач холбогдолтой, зэвсэгт хүчний хангалтын нэгэн гол төрлийн хувьд улам боловсронгуй болж хөгжсөөр байгаа билээ. Цолны мөрдөс болон мэргэжлийн таних тэмдэг хадсан цэргийн хувцсыг дүрэмт хувцас гэнэ. Цэргийн дүрэмт хувцсанд тэмдэг хадсанзуны саравчтай болон өвлийн үстэй малгай, мөрдөс, цолны болон ханцуйн тэмдэг хадсан зун, өвлийн хүрэм, китель, канттай өмд, цамц, бүс зэрэг орно. Дүрэмт хувцсыг зун, өвлийн улиралд хэрэглэх иж бүрдлээр нь нормын хангамж бүхий парад ёслолын дүрэмт хувцас, албаны болон өдөр тутмын дүрэмт хувцас гэж ангилдаг. Өнгөрсөн XX зуунд болсон Дэлхийн I болон II дайнд хамгийн голлох үүрэгтэй оролцсон ЗХУ болон фашист Германы зэвсэгт хүчний цэргийн албан хаагчдын дүрэмт хувцас, хэрэглэл, погон, петлиц, эмблем зэргийг тус тус бүлэг болгон оруулсан болно. Тэдгээрийн дүрэмт хувцасны онцлог, ялгааг ЗХУ, Орос, Польш, Франц, Америк зэрэг олон орны түүхэн уран сайхны болон баримтат кинонуудаас бид олонтаа үзэж харсаар байдаг. Аливаа улс гүрний цэргийн албан хаагчид парад ёслолын хувцсан дээрээ одон, тэмдгээ зүүж үндэсний их ялалт, баярын жагсаалдаа мөр зэрэгцэн жигдрэн алхаж, улсын сүр хүчийг бадруулсаар иржээ. Улсын сүр цэрэгтээ, цэргийн сүр жагсаалдаа, жагсаалын сүр дүрэмт хувцсандаа байдаг билээ.