“Холболтын газарзүй” ном нь “Хоёр дахь ертөнц” (The Second World), “Дэлхийг хэрхэн удирдах вэ?” (How to Run the World) хэмээх шилдэг борлуулалттай номуудын зохиогч Параг Ханнагийн бүтээл юм.  

Тэрээр зэвсэгт хүчнийхэн хилийн зурвасаас гадна нийлүүлэлтийн сувгийг хэрхэн хамгаалж буйг, улс орнууд газар нутгийн төлөө гэхээсээ илүү төмөр зам, суваг хоолой, усан онгоцны маршрут, интернэт шугам сүлжээний төлөө тэмцэлдэж буйг уг номдоо дэлгэн харуулжээ. Энэ шинэ талбарт өрсөлдөгчдийн хамгийн гол зорилго нь бүх зах зээлтэй нэгэн зэрэг холбогдоход оршино. Шинэ технологи, эрчим хүчний шинэ эх үүсвэрүүдийн ачаар нөөц баялгийн төлөө дайн гарах магадлал үгүй болж, зам тээврийн томоохон коридорууд, эрчим хүчний системүүд нь Африкийн колони улсуудын хилийг эмхэлж цэгцэлнэ гэж Ханна үзжээ. Бутарч унаж буй мэт харагдах дэлхийн энэ хаосын цаана тэднийг нэгтгэх холболтын үндэс суурь тавигдаж буй ажээ.