1980-аад оны сүүлээр социалист систем задран унаж, бүрэлдэхүүнд нь байсан улсууд либерал үзлээр хөгжих болсны тодорхой жишээ нь Монгол улс юм. Энэ үеэс хойш хэдийнээ гучаад жил өнгөрсөн бөгөөд нэгэн гараанаас зэрэг гарсан улс орнуудын хөгжил цэцэглэлтээс бид хол тасарч, хаа хойно хоцорчээ. Бид өөрчлөн байгуулалтыг “оготны хамраас ч цус гаргалгүй” хийсэн хэмээн бахархан ярьдаг байсан сан. Гэвч бид ардчилал, чөлөөт эдийн засгаар замнасан гурван арванд хөлөө нэг л олсонгүй. Үүний цаад шалтгаан нь юу вэ? Клайн “Өнгөрсөн гучин жилийн турш Чикагогийн дэг сургуулийн бодлогыг хэрэгжүүлсэн улс бүхний том компаниуд болон баян улс төрчид улсыг мэдэлдээ авсан. Энэ компаниуд, улс төрчдийг ялгахад хэцүү” хэмээн өгүүлсэн байдаг. Яг энэ дүр зураг өнөөгийн Монголын нийгэмд тодорхой харагддаг бөгөөд энэ нь эдийн засгийн цочир эмчилгээний үр дүн юм. Чикагогийн дэг сургууль буюу Шок эмчилгээ Монголд хэдийнээ эхэлсэн бөгөөд үүний нөлөөгөөр манай улс эдийн засгийн бие даасан байдлаа нэгэнт алдаад байна. Ингэж доройтсон эдийн засгаа сэргээхийн тулд юуны түрүүнд, хямарсан учир шалтгааныг нь зөв оношлох шаардлагатай аж.