Шашны номлол ярьж ,бурханд бүхнээ даатгадаг хувь заяагаа зөнд нь орхисон ядуу гэр бүлээс гаралтай Клайд хүүгийн өрөвдөлтэй амьдралын тухай өгүүлэх зохиолч Теодор Драйзерын “Америкийн эмгэнэлт явдал” роман нь зохиогчидоо маш их амжилтыг авчирсан юм. Энэ зохиолд нэгэн шашны номлогчийн хүү Клайд Грифитсийн хувь тавилан, түүний эмгэнэлт амьдралын тухай өгүүлдэг. Тэрээр ядуу амьдралдаа сэтгэл дундуур байдаг тул их амжилтад хүрэхийг эрмэлзэж эхлээд эмийн сан, дараа нь нэгэн зочид буудалд ачаа зөөгчийн ажил олж хийдэг. Грифитс тухайн үедээ тэнд буудалладаг зочдын хангалуун сайхан амьдралыг харж өөрөө ч ийнхүү сайхан амьдрах юмсан гэж мөрөөддөг байлаа. Клайд нэгэн удаа найз нартайгаа зугаалж байтал жолооч нь санамсаргүй тохиолдлоор автомашины осол хийдэг. Тэдний ихэнх нь айснаасаа болоод зугтаах бөгөөд Клайд оргож яваад Чикагод авга ах Самуэл Грифитстэй тааралджээ. Авга ах нь компаний баян эзэн байсан бөгөөд Грифитсийг өөрийн үйлдвэртээ ажилд оруулна. Энэ үед Клайдад хайр сэтгэлийн олон олон ээдрээтэй асуудал тулгардаг.