Уг роман нь зохиолчоо алдарт хүргэсэн төдийгүй америкт боолчлолыг халахад үнэтэй хувь нэмэр оруулсан бүтээл билээ. Баяд ноёд өөр хоорондоо хар арьст хүмүүсийг бараа таваар мэтээр худалдаалж, хүнд хүчир ажилд мал шиг зүтгүүлдэг байсан тухайн нийгэмд зохиолч бүсгүй шүүмжлэлтэй хандаж, хүн бүр тэгш эрхтэй хэн нэгнээ боолчлох ёсгүй хэмээх үзлийг зохиол бүтээлдээ тунхаглаж чадсан юм. Хар арьст боолуудын амьдралын хэв маяг, эмгэнэлт хувь тавилангийн тухай тод томруун дүрсэлж, олон сая цагаан арьст уншигчдын оюун бодолд боолчлол, арьс өнгөөр ялгаварлахын эсрэг үзлийг суулгаж чадсан байна. Роман хэвлэгдсэн даруйдаа борлуулалт сайтай байж, тэр ондоо удаа дараа олон мянган хувиар хэвлэгдэж байжээ.