Номын зохиогч Нийгмийн даатгалын ерөнхий газрын дарга, Нийгмийн даатгалын улсын ерөнхий байцаагч Ц.Уртнасан 2012 онд Нийгмийн даатгалын салбарын 70 жилийн ойгоор 'Алтан гадас' одонгоор шагнуулж, тэрхүү баярт мөчөө 'Social media'-гаар дамжуулан найз нөхөдтэйгээ хуваалцсанаас хойш Facebook хуудас түүний ажил, амьдралын өдрийн тэмдэглэл болон үргэлжилсээр байна. Эрдэнэт хүний биеийг олж төрөхөөс эхлээд бурханы хутгийг олох хүртэлх хүний амьдралын зовлон, жаргалд ойр дөт байдаг нийгмийн хамгааллын салбарт ажиллаж, олон түмнийхээ тусын тулд хамт олныхоо дэмжлэг, оролцоотойгоор хийж бүтээсэн ажил үйлс, санаачилга, өөрийн итгэл үнэмшилээр хийсэн өөрчлөлт шинэчлэлт, гаргасан шийдвэрийн тухай танилцуулга, нутаг ус, нөхөрлөл, хамтын ажиллагааны тухай дурсамж, үзэл бодол, итгэл үнэмшлийг илэрхийлсэн тэмдэглэл болжээ.