Дэлхий дээр 300.000 гаруй зүйл дээд ургамал оршдогоос 20 000-50 000 зүйл ургамлыг хүнсэнд хэрэглэх боломжтойг тогтоосон байдаг. Үүний 5000 төрлийн ургамлыг хоол хүнсэндээ хэрэглэж ирсэн бөгөөд одоогоор 150 орчим төрлийн ургамал хүн төрөлхтөний хоол хүнсний хэрэгцээг хангахад гол үүрэг гүйцэтгэж байна. Гэтэл үүнээс дөнгөж 3 төрлийн ургамал нийт уураг, калорийн хэрэгцээний 60 хувийг хангаж байна. Нөгөө талаар байгаль дээр хэдийгээр биологийн төрөл зүйл цөөрөх, нөөц нь багасах үзэгдэл шинэ зүйл биш боловч экологийн тэнцвэрт байдал улам бүр алдагдаж, байгалийн гамшиг эрс нэмэгдсэн, хүний бодлогогүй буруу хэрэглээ, үргүй үйл ажиллагаа зэрэг сөрөг үзэгдлүүдээс болж болон байгалийн ургамлын генофонд төрөл, зүйл тоо хэмжээ, тархцын хувьд цөөрөх, багасах хурдац нэмэгдсээр байна. Өнгөрсөн XX зууны эцсээр 50000 зүйл ургамал устаж үгүй болсон тооцоо байдаг бөгөөд үзэгдэл өнөөдөр улам өргөн далайцтай болж байна. Хүн ам өсөн нэмэгдэхийн зэрэгцээ нийгмийн тогтвортой хөгжлийг дагаад олон төрлийн жимс жимсгэний бүтээгдэхүүн эрэлт хэрэгцээ улам ихсэж ялангуяа биологийн идэвхит нэгдлээр баялаг экологийн цэвэр бүтээгдэхүүн нэн тэргүүнд шаардагдах боллоо. Ургамлын гаралтай бүтээгдэхүүний үйлдвэрлэлийг нэмэгдүүлэх чиг хандлагад эрс өөрчлөлт орж нэгж талбайгаас авах ургац болон бүтээгдэхүүний хэмжээг нэмэгдүүлэх замаар өөрөөр хэлбэл ургамлын генетикийн потенциалыг бүрэн ашиглах явдал юм. Манай орны байгаль цаг уурын нөхцөл нь сэрүүн бүсийн жимсний аж ахуйг хөгжүүлэх бололцоотой бөгөөд ялангуяа өөрийн орон нутагт зохицсон зэрлэг жимс жимсгэнэд түшиглэсэн амин дэмийн гол эх үүсвэр болсон жимсний аж ахуйг хөгжүүлэх бодит боломж байгаа билээ.