'Хобби' дунд сургуулийн монгол хэл уран зохиолын багш Б.Энхчимэг бага, дунд ангийнханд зориулсан шүлгийн номоо уншигч таны гар дээр тавьж байна. 'Хүүхдийн зохиол' бол хамгийн хэцүү төрөл. Учир нь хүүхэд шиг бодож, сэтгэж, мөрөөдөж байж л бичихгүй бол тэр 'хүүхдийн зохиол' болж чадахгүй. Тийм болохоор энэ төрлийг хэн бүхэн барьж авч, дагнаж бичээд байдаггүй. Б.Энхчимэг багш монгол ухаан, өв соёл, ёс заншил, нандин сайхныг тусган харуулсан, танин мэдэхүйн чиглэлтэй сайхан шүлгүүд бичиж, энэхүү номондоо багцлан оруулжээ. Өглөө эрт нисэж яваа цохыг хараад 'Эртлэн боссон энэ цох идэх юм олоод энхрий бяцхан үрстээ хүргэж өгөхөөр яваа ээж цох байх' гэж бодсон шүлгээс эхлээд сонин сайхан дүрслэл, зүйрлэлтэй шүлэг олныг бичсэн байна. Тэрбээр 'Мэхээрийн бор хулгана' шүлэгтээ ... _Өвдсөн хүнд өгөх гэсэн юм Үүцнээсээ жаахныг хайрлаач Авсан мэхээрийнхээ оронд Ааруул ээзгий өгье гэж Хормой дэвсэн мөргөж Хошуу цорвойн гуйж байгаад Хагас талыг нь авдаг Хүнлэг сайхан ёстой гэнэ ...Өлөн цагаан өвсөөр Өөрийгөө боож хороосон Өч төчнөөн хулганатай Өвгөн ах минь таарчээ Хөндийн бүх хөеөг Хуу хамж авчхаад Оронд нь юу ч хийлгүй Орхиод явсан байжээ_' гэжээ.