Аливаа улс үндэстний гадаад харилцааны түүхийг нягтлан судалж боловсруулах нь тухайн улсын түүх судлалын нэг зорилт байдаг. Дундад зууны үеийн Монгол улсын гадаад харилцааны түүхийн зайлшгүй судлавал зохих асуудлын нэг бол Монгол- Түвэдийн харилцааны түүх юм. Уг номын зохиогч XVI-XVIII зууны Монгол-Түвэдийн харилцааны түүхэнд холбогдох монгол, түвэд хэлээр буй сурвалж хэрэглэгдэхүүний мэдээ баримтыг бололцооны хэрээр илрүүлэн, судалгаа шинжилгээний эргэлтэд оруулах, түүндээ тулгуурлан хоёр орны хооронд болж байсан түүхэн үйл явдлаар дамжуулан уг асуудлыг нэгтгэн шинжилж, зохих дүгнэлт өгсөн байна.