Монголын түүхийн үнэт эх сурвалж, эртний уран зохиолын дурсгал бичиг болох “Монголын Нууц Товчоо”-г Монгол их хаадын угсаа гарвал, монголчуудын ахуй амьдрал, үндэсний түүх, хэл бичиг, утга соёл, ардын аман зохиол, бөө мөргөл, зан заншлийн их нэвтэрхий толь хэмээн үзэх бүрэн үндэстэй. Дэлхий даяар суу билгээрээ бүхийлэн гайхамшгийг үүтгэж чадсан, алдар нэр нь өдгөө ч дөрвөн зүг, найман зовхист цуурайлан буй мянганы суут монгол хүмүүн, их эзэн Чингис хааны түүх намтрыг товчоолон тэмдэглэсэн энэ л хөлгөн судар олон бар дэвтрийн уламжлалаар бидний үед ирсэн билээ. Сүүлийн зуугаад жилийн турш гадаадын олон хэлээр орчуулагдан олон дахин хэвлэгдэж, монгол хүний үнэ цэнийг алдаршуулан мандуулсаар ирсэн содон бүтээл юм.