Монгол Улсын ном хэвлэлийн түүхэнд судлагдаагүй орхигдсон олон асуудал бий. Түүний нэг бол доктор Т.Етекбайн сонгон судалсан ХХ зууны ном хэвлэлийн түүхэн хөгжлийн суурь асуудал бөгөөд одоогоор эх бичиг, сурвалж судлалд төдийлөн тэмдэглэгдээгүй, судлагдаагүй зурвас үе болох 1911-1940-өөд оны хэвлэлийн түүхэн хөгжил билээ. Ялангуяа нийгмийн шинэ давхарга, шинэ үзэл баримтлалын хувьсгал хөгжлийн зааг дээр, шинэ арга технологиор үүсэж буй болсон хэвлэлийн түүхэн хөгжлийн төлөв байдал, тоо баримтыг гадаад дотоодын эх сурвалж, архивын бичиг баримтад тулгуурлан шинэ мэдээ, баримтыг илрүүлсэн явдал хэвлэлийн ажлын түүхэн хөгжлийн тэмдэглэлд чухал хувь нэмэр оруулж байгаа юм.