Америкийн австри гаралтай, эдийн засагч, нийтлэлч, сурган хумүүжүүлэгч, XX зууны менежментийн хамгийн нөлөө бүхий эрдэмтэн онолчдын нэг юм. Австри улсын нийслэл Вена хотод 1909 оны арваннэгдүгээр сарын 19-нд төрж, өссөн ба 11 настайдаа Германд шилжин ирж, Гамбург, Франкфурт хотод суралцсан байна. Нацист дэглэмээс зугтан 1937 онд АНУ-д ирж суурьшин 1943 онд тус улсын жинхэнэ иргэн болжээ. Тэрээр 1950-1971 онд Нью-Йоркын Их сургуулийн менежментийн багшаар ажиллаж, 1971-2005 онд Клермонтын Их сургуулийн нийгмийн шинжлэх ухаан ба менежментийн профессор болсон аж. Улмаар 1939 оноос эхлэн 39 ном туурвиж, The Wall Street Journal ба Harvard Business Review зэрэг олон зуун өгүүлэл, нийтлэл хэвлүүлжээ. Нэрт эрдэмтэн орчин үеийн даяарчлагдсан зах зээлийн онолыг боловсруулж, «мэдээллийн ажилтан»-ы талаархи үзэл баримтлалыг анхлан дэвшүүлсэн юм. Дэлхийн тэргүүлэх бүх концерн өнгөрсөн зууны 40-өөд оны дунд үеэс түүний онол үзэл баримтлалаар амьдарч байна. Дракер эдийн засгийн дэвшил бүхий зохицол нийцтэй нийгмийг байгуулж болно гэдэгт итгэж байсан аж. Гэхдээ тэр амьдралынхаа сүүлийн жилүүдэд бусад аугаа сэтгэгчдийн нэгэн адил хойч үеийнхэндээ «Пирамид шиг бат бэх байхаар байгуулсан корпорацууд эдүгээ даавуун майхан шиг хэврэг боллоо шүү» хэмээн халаглаж анхааруулж байжээ. Менежментийн шинжлэх ухааны сонгодог сэтгэгч Питер Ф. Дракер 96 насандаа таалал төгссөн.