Шөөбөр хэмээх нэрээрээ цахим орчинд танигдсан хуульч, өмгөөлөгч В.Энхтамир өөрийн хүүхэд наснаас өнөөдрийг хүртэлх амьдралын дурсамж ба сургамжийг нэгтгэн “Шар хадны тасагт мэндэлсэн дурсамж” хэмээн нэрийдсэн номоо нийтийн хүртээл болгожээ. Зарим хүн нэрээс нь цэрвэж болох ч дотор буй агуулга нь нэг л нээсэн бол таныг дуустал нь уншихад хөтлөхүйц бүтээл болжээ. Зохиогчийн төгсгөлийн үгэндээ зориуд тусгайлан тэмдэглэсэнчлэн энэхүү бүтээл үнэхээр “...түрүү үеийн түүчээ, одоо үеийн үргэлжлэл, бас айсуй та бүхний угтал” болсон бүтээл болж чаджээ. Хувь хүний түүх нийлж бүтэн нийгмийн түүх бүрддэг бөгөөд энэхүү ном нь өнгөрөгч 40 гаруй жилийн нийгмийн түүхийг дүрсгүй хүү, авхаалжтай оюутан, мэргэшсэн төрийн албан хаагч, итгэлт өмгөөлөгчийн амьдралаар дүрслэн харуулжээ. Гэвч хамгийн гол нь хувь хүний хөгжил ба залуучуудын карьер төлөвлөлтөд маш их өгөөжтэй ном байх тул та бүхний таалан уншихыг зөвлөж байна.