Сүнзийн Дайтах урлаг хэмээх уг ном 2500 орчим жилийн өмнө бичигдсэн боловч өдгөө ч үнэ цэнээ хадгалсан хэвээр байгаа бөгөөд бизнес, хувь хүний хөгжлийн гол бүтээлийн нэгд зүй ёсоор тооцогддог билээ. Тухайлбал, Харвардын их сургуулийн Бизнесийн сургууль уг номыг хичээлийнхээ гол гарын авлага болгон авч үздэг байна. Түүнчлэн Пентагон, CEO.сom зэрэг байгууллагуудаас гаргасан заавал унших номын жагсаалтад багтжээ.

Олон аж ахуйн нэгж, пүүс компаниуд энэ номын үзэл санааг эдийн засгийн удирдлага, зах зээлийн борлуулалтын арга барил болгон ашиглаж, “цэргийн эрдмийг бизнесийн зориулалтаар хэрэглэх” болсон нь сонирхолтой. Сүнз шилдэг жанжны чадварыг доорх байдлаар ангилжээ: 

• Хамгийн гарамгай дайчин дайсныхаа төлөвлөгөөг эвдэж талаар болгоно.

• Түүний дараачийнх нь дайсныхаа холбоо сүлбээг үгүй болгоно.

• Удаах нь цэргийн хүчийг нь дайран довтлохыг эрмэлзэнэ.

• Эрдэм ухаанаар хамгийн дорой нь хот балгадыг бүслэн сууна.   

Сүнзийнхээр бол амжилтад хүрэх дээд зэргийн стратеги нь байлдааны ажиллагаа эхлэхээс өмнө хамгийн бага гарз хохирол, зардал гарган ялах явдал юм.