Хэн хүний тэр бүр анхаарал хандуулаад байдаггүй өсвөр залуу насанд нийгмийн жинхэнэ төрхтэй нүүр тулахад хөндүүрлэсэн сэтгэлийн шаналан, бачуурсан бодол мэдрэмжийг зохиолч Сэлинжер эл зохиолын хүүгийн дүрээр уудлан гаргахыг зорьжээ.

Зохиолын дүр болох Холден Колфилд бол жинхэнэ эр өсөж, эсгий сунадаг насан дээрээ яваа хүү. Гэхдээ уншигч та түүний эрээ цээргүй үг хэлж, аашилж буйг уншаад “Энэ ер нь хүүхэд мөн үү?” хэмээн яаран дүгнэх гэх болов уу? Чухамдаа Холден бол өсвөр насны хүүхдийн сэтгэл зүйн дүр, энэ насны хүүхдүүд бол бидний хийгээд нийгмийн тусгал. Хүүхэд, залуучууд гол төлөв томчуудын үлгэрлэснийг даган дуурайж, сайн сайхан гэж итгэх нь олонтоо. Аливааг шүүн тунгаахгүйгээр өөриймшүүлэх аваас буруу замаар будаа тээх нь энүүхэнд байна л гэсэн үг. Харин тэрээр муу муухайг өөрийн биеэр туулах бүрдээ жигшин зэвүүцэх бөгөөд хүмүүсний ертөнц хэчнээн “худал, хуурмаг” болох талаар өгүүлнэ.