Тухайн үед холбогдох түүхэн зохиолын дотор зохиогч нь үл мэдэгдэх "Алтан товч" (qaγad-un ündüsün-ü quriyangγui altan tobči neretü sudur) онцгой байр суурь эзэлдэг. Эл зохиолыг бичсэн он цагийг тодруулахад амаргүй боловч, тус сурвалжийг судалж, зохиогдсон он цагийнх нь тухайд дэвшүүлсэн эрдэмтдийн саналыг үндэстэй хэмээн үзэж болохоор байна. Тэдгээр эрдэмтний үзсэнээр зохиогч нь тодорхойгүй "Алтан товч"-ийг 1604 оноос өмнө зохиосон байж таарахгүй. Учир нь, "Алтан товч"-д өгүүлж буй үйл явдал Лигдэн хаан (1604) ор сууснаар төгсөж буй билээ... "Алтан товч" бол өгүүлэн буй цаг үед холбогдох монголчуудын түүх бичлэгийн онцгой содон бүтээл билээ. Тэмдэглүүштэй нэгэн зүйл нь тэрхүү түүхэн цаг үед монголчуудын түүхээ сонирхон судлах явдал огтхон ч багассангүй, харин ч ихэссэн ажээ.