АНУ-ын 56 дахь Төрийн нарийн бичгийн дарга, Ерөнхийлөгчийн Үндэсний Аюулгүй байдлын асуудал хариуцсан туслах байсан Хенри Алфред Киссинжерийн дипломат үйл ажил гэж чухам ямар албан хэрэг болох, улс хоорондын харилцааны түүхэнд энэ нарийн урлагийн гүйцэтгэсэн үүрэг, уг чухал албаны зовлон жаргалыг тод томруун харуулсан номыг ахмад дипломат Д.Чулуундорж орчуулжээ. Хенри Киссинжер энэ номондоо дипломат ажлын түүхийг өөрийн ажиглалт, тайлбар, туршлага, дэлхийн удирдагч нартай хийсэн хувийн хэлэлцээр, нууц яриа, том үйл явдлууд, төрийг жолоодох мэдлэг, чадвар зэргээр тодотгон өгүүлжээ. Мөн янз бүрийн улсууд гадаад бодлогоо явуулах, түншээ сонгох, санаачилгыг гартаа авах, цаг үеийн уур амьсгалд хэрхэн зохицох зэрэг маш нарийн эв дүй, мэдрэмжийн талаар өгүүлэн, дипломат үйл хэргийг илүү танин мэдэхэд тус нэмэр болох олон санаа, үйл явдлыг тусгасан нь сайшаалтай. Ялангуяа Америкийн дэлхийд эзлэх байр суурийг ойлгоход тун чухал бүтээл болсон байна.