Циркийнхэн хотод огт санамсаргүй хүрээд иржээ. Айлчлан тоглолтынх нь тухай ямар ч зарлал таарсангүй. Хотын төвийн зарлалын самбар, утасны шонгууд дээр нэгээхэн ч зар байсангүй. Орон нутгийн сонинуудад энэ тухай мэдээлэх нь бүү хэл зурвас ч болох нь ээ дурдаагүй билээ. Харин тэд өчигдөрхөн ямар ч хөл хөдөлгөөнгүй байсан хотын тэр хэсэгт гэнэт гараад ирсэн юм.

Үдшийн бүрэнхийд манхайх хар цагаан судалт майхнууд дотор хүний оюун санааг өтгөн үүлэнд төөрүүлж, мөсөн цэцэрлэг дундуур тэнүүлэх ид шид нуугдана. Тэнд эрээн цоохор шивээстэй уран нугараач бүсгүй эвхэрч атирсаар жижигхэн шилэн саванд орохыг алмайрч харангаа түлэгдсэн чихэр, бүлээн шанцайны үнэрт таатайяа мансууран зогсох болно.

Шөнийн циркт тавтай морилогтун.

Манарсан утаа май, олон давхар нөлөөт толины цаана хар багаас нь зааж сургасан мэргэн багш нартаа няцашгүй тангараг өргөсөн Селиа, Марко хэмээх хоёр залуухан илбэчний хүч шавхсан их тулаан өрнөж буй. Тэдний хувьд циркийн тайз эр зориг, уран төсөөллийн ширүүн тулааны талбар болсон байлаа. Гэвч тулааны төгсгөлд тайзан дээр зөвхөн нэг нь л үлдэх учиртайг хэн нь ч төсөөлөөгүй.