МУИС-ийн “Монгол судлалын хүрээлэн”-гээс эрхлэн хэвлүүлдэг “МУИС-ийн профессорын өв” цувралын энэ удаагийн дугаарт Монгол Улсын Соёлын гавьяат зүтгэлтэн, Д.Нацагдоржийн нэрэмжит шагналт зохиолч, С.Буяннэмэхийн шагналт утга зохиол судлаач доктор, профессор Долгорын Цэнджавын эрдмийн бүтээлийн чуулганыг “Утга зохиолын боловсрол”, “Утга зохиолын шинжлэл”, “Зохиолчийн урлан судлал” гурван ботиор өргөн толилуулж байна. МУИС-ийн Утга зохиол, урлаг судлалын тэнхимийн багш, зөвлөх профессороор олон жил ажиллахдаа “Орчин үеийн Монголын уран зохиол”, шүүмж судлал, утга зохиолын туурвил зүй, сэтгүүл зүйгээр “Хэвлэл мэдээллийн менежмент”, “Эрэн сурвалжлах сэтгүүл зүй” “Редакторлах арга”, “Илтгэх урлаг” зэрэг хичээлээр лекц уншихын зэрэгцээ сургуулийнхаа Утга зохиолын дугуйлангийн зөвлөх багшаар ажиллаж, утга зохиол сонирхогч залуу авьяастнуудыг төрүүлэхэд бүтээлч хувь нэмрээ оруулсан сурган хүмүүжүүлэгч юм. Тэр бээр Монголын шинэ үеийн уран зохиолын нэртэй төлөөлөл болж, ялангуяа роман, тууж, өгүүллэг зэрэг хүүрнэл зохиолын төрөлд өөрчлөлт шинэчлэл хийсэн хэмээн судлаач, шүүмжлэгчид зүй ёсоор үнэлжээ. Долгорын Цэнджав судалгаа, эрдэм шинжилгээний олон өгүүлэл, утга зохиолын шүүмжийн ном гаргасны дотор “Нүүдэлчний реализм” буюу “Монгол реализм” гэдэг онолын ч гэж болох нүүдэлчдийн ахуй амьдрал, зан заншил, өвөрмөц сэтгэлгээ, уламжлал шинэчлэл, оюун санааны хувирал өөрчлөлтийг уран зохиолд шинээр нээж үзүүлэх хөх үндэстний сэтгэлгээг шинэ төвшинд гаргах арга замыг гаргажээ. Энэ бол онол сэтгэлгээний бүтээлч хандлага мөн.