Судлаач мэргэд түүхийг бичдэг, туурвигч зохиолчид түмэнд хүргэдэг гэсэн нийтлэг ойлголт, үгийн үнэний дагуу өндөр дээдсийнхээ үйл амьдралын товч тоймыг түүхэн ном бүтээлүүдээс авч, тухайн цаг үеийн амьдралын хөрсөн дээр уран сайхны аргаар буулгаж дүр бүтээхийг хичээсэн билээ. Тус бүрийн үйл амьдралын онцлогтой олон хүнийг нэг аргаар бичвэл уншигчдад сонирхол муутай, түүхэн өгүүлэл уншсан мэт сэтгэгдэх тул эсээ, дурсамж, ургуулан бодолт, харилцан ярилцлага, эдүгээчлэн сэтгэх, дэргэдээс нь үзсэн байдлаар дүрслэх олон хэлбэрээр туурвисан минь төдийлөн буруугуй болов уу. Перс дэх Ил хаадын улсыг үндэслэн байгуулагч Хүлэгү нарын дэргэд төрийн сайдаар ажиллаж байсан. Персийн алдарт түүхч Рашид-ад-дин Хамадан Юань улсаас Хубилай хааны илгээснээр очсон Болд Чинсаны хамт "Жами-ат-таварих" (Судрын чуулган) нэрт алдарт зохиолоо бичсэн билээ. Тэр алдарт бүтээлд нь орсон шүлгийн Yp хүүхдэд эцгийн нэр нь хэзээд амьд байдаг. Yp хүүхдүүдэд нь эцгийн нь мөрөөдөл ямагт үлдсэн байдаг гэсэн хоёрхон мөрийг ард түмэнд толилуулаад, энэ хоёрхон мөр эцэг үрийн холбооны төдийгүй улс гүрэн дээр буулган үр хүүхэд нь мэт ард түмэнд элбэрэлт эцгийг орлох хаан хүний дүр, сүр, хүсэл мөрөөдөл нь мартагдахааргүй оршин уламжилж амьдарч хэрэгжиж байх жамтай гэсэн гүн утга бүхий үг гэж сэтгээд дээдсийн амьдралаас шүүрдэн бичиж буй минь үргүй хөдөлмөр бус байхаа.